مصر تغازل الخليج.. مشروعات واعدة تدر مليارات الدولارات
جذب الاستثمارات واحد من اهم اهداف الحكومة في الوقت الحالي، واحد من الاستثمارات دي هيا الاستثمارات الخليجية، ياتري الحكومة هتجذب الاستثمارات الخليجية لمصر أزاي.. والدولة مستهدفة توصل لكام استثمارات خليجية في مصر.
الفترة الرئاسية الجديدة للرئيس عبدالفتاح السيسي الهدف الرئيسي فيها هو جذب الاستثمارات ورؤوس الأموال الأجنبية للدخول للسوق المصري، خصوصا أن الدولة المصرية عندها هدف أنها تكون مركز اقليمي للتبادل التجاري، والهدف ده مش هيحصل الا في حالة واحدة بس وهيا وجود تصنيع محلي كبير قادر علي تغطية النقص في السوق المحلي وكمان التصدير للخارج.
الدولة المصرية في الوقت الحالي عندها هدف رئيسي هو دعم وزيادة الصادرات المصرية للخارج وتقليل الاستيراد، وتخفيف الضغط علي الدولار، خصوصا أن الفاتورة الاستيرادية لمصر علي مدار السنين اللي فاتت كانت كبيرة جدا واغلبها سلع استفزازية ممكن مصر بكل سهولة تصنيعها بشكل محلي وكمان تكون دولة من الدول الرائدة في تصدير اغلب السلع للخارج.
طيب اية اللي عملته الدولة علشان تحفز الاستثمارات الخارجية للدخول للسوق المصري؟.
في الفترة اللي فاتت الدولة قدمت تحفيزات كبيرة جدا لدخول شركات القطاع الخاص والمستثمرين للدخول للسوق المصري، والتسهيلات دي تضمنت تسهيلات في الحصول علي الاراضي لاقامة مختلف المشروعات والمصانع وكمان تسهيلات في الحصول علي تصاريح البناء والتشغيل من خلال منح الرخصة الذهبية للمشروعات وكمان تسهيلات واعفاء للضرائب ورسوم التصدير واعفاء من الجمارك علي المواد الخام.
وعلشان الدولة توصل لخطتها لجذب رؤوس الأموال الخارجية، فالحكومة بتعمل زيارات خارجية لعدد كبير من الدول الخارجية، وبيعقدوا اجتماعات مع المسئولين والشركات هناك علشان يعرضوا فرص الاستثمار الموجودة في السوق المصري، والزيارات دي الحكومة كلها بتقوم بيها بداية من الرئيس عبدالفتاح السيسي واللي بيكون حريص في كل جولاته الخارجية علي عقد لقاءات مع كبريات الشركات العالمية لعرض التسهيلات الحكومية لشركات القطاع الخاص للدخول للسوق المصري.
الدكتور مصطفي مدبولي رئيس مجلس الوزراء كان في زيارة مهمة لدولة الكويت، واول الملفات اللي كانت حاضرة علي مناقشاته هو استهداف جذب القطاع الخاص للسوق المصري، ورئيس الوزراء عرض عن المسئولين والشركات هناك ملامح برنامج الإصلاح الاقتصادي المصري واللي أعطى أولوية للقطاع الخاص واللي مستهدف الوصول بيه لـ 65% من إجمالي الاستثمارات الاجمالية للدولة المصرية.
رئيس مجلس الوزراء اكد للشركات والمسئولين بدولة الكويت أن مصر مليانة بالفرص الاستثمارية المهمة اللي يقدر من خلالها القطاع الخاص يحقق عائد مجزي اقتصادي كبير لهم، وكمان يستفيدوا من التسهيلات اللي بتقدمها مصر سواء في اجراءات الحصول علي الأراضي أو اجراءات الحصول علي التراخيص للبناء والتشغيل.
خطة الدولة حاليا لجذب مزيد من الاستثمارات الخارجية بتقوم علي الوصول للمستثمرين في اماكنهم، وعرض عليهم فرص الاستثمار المتاحة في مصر والمجالات والمناطق المتاحة قدامهم للدخول للسوق المصري، والهدف من المحاولات دي كلها هو الوصول للهدف الاساسي وهو زيادة الانتاج المحلي وتغطية الطلب المحلي والتصدير للخارج.
