إيه هي عصا المركزي اللي بيسيطر بيها على سيولة البنوك؟ ومين اللي أكتر حد بيستفاد منها؟
يا ترى إيه اللي بيخلّي البنك المركزي المصري يرمي في السوق 65 مليار جنيه كده مرة واحدة؟ وهل دي فلوس بتطلع من رصيده ولا بيستلفها؟ وليه بيطرح أذون خزانة أصلاً؟ هو الموضوع مجرد لعبة أرقام ولا فيه حاجة أكبر من كده؟ ولما بيطرح الأذون دي، مين اللي بيجري يشتريها؟ البنوك بس ولا فيه حد تاني في الصورة؟
من كام يوم البنك المركزي المصري أعلن إنه هيطرح أذون خزانة بقيمة 65 مليار جنيه.. بس قبل ما ندخل في التفاصيل لازم نفهم الأول .. إيه هي أذون الخزانة دي؟ وليه البنك المركزي بيعمل كده؟ وازاي بيتم الموضوع؟ ومين بيستفيد منه؟ يلا بينا ناخد الموضوع خطوة خطوة.
إيه هي أذون الخزانة؟
أول حاجة لازم نكون متفقين عليها هي ان أذون الخزانة دي مش شيكات بتترمي في الشارع.. لا دي أدوات دين قصيرة الأجل .. يعني ورق مالي الحكومة بتصدره عشان تستلف منه فلوس لفترة معينة بتتراوح من 3 شهور لسنة.. زي إنك بتستلف من جارك 100 جنيه وتقوله هردهملك بعد شهرين مع 10 جنيه زيادة كفايدة.. نفس الفكرة هنا بس بأرقام أكبر بكتير طبعاً.. الطرح اللي بتكلم عنه النهاردة هو 65 مليار جنيه مقسمين على عطاءين.. 25 مليار لمدة 91 يوم .. و40 مليار لمدة 273 يوم يعني الفلوس دي هترجع للي اشتراها مع فايدة بعد المدة دي تنتهي.
طب ليه البنك المركزي بيطرح أذون الخزانة؟
بص يا سيدي.. الهدف الأساسي من طرح أذون الخزانة هو تمويل عجز الموازنة العامة للدولة.. يعني لما الحكومة بتصرف على مشاريع زي بناء مدارس أو مستشفيات أو حتى مرتبات الموظفين وتكتشف إن الإيرادات زي الضرايب مش كفاية بتلجأ للاستدانة.. وأذون الخزانة دي واحدة من أدوات الاستدانة دي.. مش بس كده البنك المركزي كمان بيستخدمها عشان يظبط السيولة في السوق.. يعني لو فيه فلوس كتير أوي مركونة في البنوك بيطرح الأذون دي عشان يسحب السيولة الزيادة دي ويقلل التضخم.
وازاي بتتم عملية طرح أذون الخزانة؟
الموضوع بيحصل زي المزاد كده.. البنك المركزي بيعلن عن الطرح ده على موقعه الإلكتروني وبيقول: 'يا جماعة، عندنا 65 مليار جنيه أذون خزانة مين عايز يشتري؟.. البنوك والمستثمرين بيدخلوا يقدموا عروضهم يعني بيقولوا: 'أنا مستعد أشتري بكذا مليار بسعر فايدة كذا.. البنك المركزي بيختار العروض اللي تناسبه يقبلها ويرفض الباقي.. مثلاً في الطرح اللي قبل كده في يناير 2025 البنك قبل عروض بقيمة 77 مليار جنيه من إجمالي عروض وصلت 169 مليار وكان سعر الفايدة بيتراوح بين 26% و27%. . يعني الموضوع فيه منافسة .. والبنك بيحب يختار الأرخص ليه بعد ما بيتم الاتفاق الفلوس بتتحول للحكومة والبنك بيدير العملية دي نيابة عن وزارة المالية.
ومين بيشتري الأذون دي؟ و هوّ البنك المركزي بيبيعهم لأي حد؟
لا طبعاً.. اللاعبين الأساسيين هنا هما البنوك العاملة في مصر زي البنك الأهلي وبنك مصر والبنوك التجارية التانية.. دول بيشتروا الحصة الكبيرة عشان عندهم سيولة كبيرة وبيدوروا على استثمار آمن يجيبلهم عائد مضمون.. كمان فيه مستثمرين أجانب بيخشوا على الخط خصوصاً لو شافوا إن الفايدة مغرية.. والأذون دي بتعتبر استثمار محبب ليهم لأنها مضمونة من الحكومة يعني مفيش خوف إن الفلوس تضيع.
