4 أحداث هزت مصر.. إيه اللي حصل
مصر كانت على موعد مع احداث اقتصادية مهمة جدا الاسبوع اللي فات واللي أكدت إن الاقتصاد المصري ماشي في سكة السلامة والانطلاقة الكبيرة.. إيه اللي حصل واحنا رايحين على فين.
اليومين اللي فاتو مصر شهدت أكتر من حدث اقتصادي كبير عزز الثقة في خطط الحكومة والمؤشرات الاقتصادية والمالية والبداية كانت مع الحدث الأبرز وهو قرار لجنة السياسة النقدية بالبنك المركزي المصري في أول اجتماع ليها في السنة الجديدة وقررت امبارح الخميس تثبيت سعر الفائدة عند المعدلات الحالية.
قرار التثيبت أثار حالة من الاستقرار في الأسواق رغم إن كان فيه توقعات بهفض الفايدة في الاجتماع الاخير وطبعا قرار تحديد سعر الفايدة بيكون بناء على مؤشرات التضخم في الأسواق واللي لسه في حدود متسمحش بخفض سعر الفائدة.
الحدث الأهم التاني كان إعلان وكالة "موديز" للتصنيفات الائتمانية تأكيد التصنيف الائتماني لمصر عند "Caa1"، لكن في نفس الوقت.. وضعت النظرة المستقبلية لمصر على "إيجابية".. وده معناه إن الوضع في تحسن وإن فيه آمال بتحسين قدرة الدولة على الوفاء بديونها في المستقبل.. وده مش بس كلام في الهوا.. لأن مصر بدأت تحقق تقدم كبير في إعادة التوازن المالي المحلي والخارجي.
وزي ما احنا عارفين إن التصنيف الائتماني ليه دور مهم جدًا في تحريك عجلة الاقتصاد وفتح الأبواب للاستثمارات العالمية.. وكمان تصنيف الدولة عالي ده معناه إن الناس والمستثمرين بيثقوا في الاقتصاد بتاعها.. وده بيخلي الدولة قادرة على اقتراض الأموال بأسعار فائدة منخفضة.
من الأحداث المهمة اللي حصلت في مصر كانت الاعلان عن الاستثمارات السعودية الجديدة في السوق المصري واللي تقدر بالمليارات وبداية ضخ حوالي 15 مليار دولار خلال 3 سنين جاية في مصر، وده هيحصل بالتزامن مع الجهود المبذولة للحكومة المصرية لحل مشاكل المستثمرين السعوديين.
ومن ضمن مشروعات الشراكة الاقتصادية كمان، هو مشروع الربط الكهربائي بين مصر والسعودية، واللي بيعتبر من أكبر المشروعات في الشرق الأوسط، وبيهدف لتبادل 3 جيجاوات من الطاقة الكهربائية بعد اكتمال مراحله السنة الجاية، عشان كده متوقع إن يتم بدء التشغيل التجريبي للمرحلة الأولى لخط الربط الكهربائي مع السعودية في شهر أبريل القادم.
كمان، متوقع إن المملكة تحول ودايعها الموجودة في مصر واللي بتقدر بحوالي 10.3 مليار دولار لاستثمارات مباشرة عشان تضخ في شرايين الاقتصاد المصري خلال الفترة الجاية.
والسعودية أعلنت كمان على لسان وزير الطاقة السعودي إنها هتستثمر في أكبر مشروع لطاقة الرياح في مصر مع توقعات بوصول الاستثمار في المشروع لأكتر من 10 مليار دولار مقارنة بمشروع اماراتي مماثل بنفس الرقم.
من بين الأحداث اللي هتغير موازين الاقتصاد زيارة الرئيس السيسي لإسبانيا وترفيع العلاقات الثناينة لمستوى العلاقات الاستراتيجية واجتماع الرئيس مع رؤساء كبرى الشركات الاسبانية في مجالات صناعة السفن والتكنولوجيا والنقل وغيرها والدعوة لزيادة الاستثمارات الاسبانية في مصر عن طريق توطين الصناعة الاسبانية في مصر في ضوء العلاقات المميزة بين البلدين وخاصة إن اسبانيا سادس أقوى اقتصاد في أوروبا.
