تحول مهم في استراتيجية البنك المركزي.. يا ترى ايه اللى بيحصل؟
هو إيه اللي بيحصل في السياسة النقدية للبنك المركزي؟ وليه التركيز اتحول من محاربة التضخم لتحفيز الاقتصاد؟ وهل ده معناه إن الفايدة هتنزل؟ طيب لو الفايدة نزلت الفلوس اللي في البنوك هيحصل لها إيه؟ وهل القرار ده هيأثر على حياتك كمواطن؟.. في الفيديو ده هنفك شفرة التحول الكبير في سياسة البنك المركزي وهنعرف معناه وتأثيره على الاقتصاد وحياتنا اليومية.. تابع معانا للآخر عشان تفهم الصورة كاملة.
لو رجعنا لسنة 2023 و2024.. هنلاقي إن البنك المركزي كان مركز كل جهوده على حاجة واحدة وهي السيطرة على التضخم. .. اللى معناه ببساطة إن الأسعار بتغلى بشكل مستمر.. والفلوس اللي معاك بتقل قيمتها الشرائية.. البنك المركزي كان بيرفع الفايدة علشان يقلل الفلوس اللي في السوق فبالتالي يقلل الطلب والأسعار تهدى شوية.. لكن حاليا في 2025 الصورة بدأت تتغير.. والمركزي بيحول تركيزه من استهداف التضخم إلى تحفيز الاقتصاد.
طب ده معناه إيه؟
معناه ببساطة انه بدل ما يكون الهدف الأساسي هو تخفيض الأسعار بأي طريقة.. بقى التركيز على دعم الاستثمار والإنتاج.. علشان الاقتصاد يبدأ يتحرك وينمو.. والقرار ده جاي بعد ما ظهرت مؤشرات إن التضخم بدأ يهدأ وإن الاقتصاد بدأ ياخد أنفاسه.
طيب وإيه تأثير التحول ده على الاقتصاد؟
أهم حاجة في الموضوع ده هو خفض أسعار الفايدة.. لما البنك المركزي يقلل الفايدة.. الفلوس اللي في البنوك بتبقى أقل تكلفة للاقتراض .. يعني الشركات والأفراد هيلاقوا إن القروض بقت أرخص وأسهل.. فبالتالي الاستثمار هيزيد والشركات هتبدأ تتوسع وتوظف ناس أكتر.
كمان في حاجة مهمة وهي إن الموازنة العامة للدولة هتستفيد.. لأن الحكومة بتستلف جزء كبير من الفلوس عن طريق إصدار سندات وأذون خزانة بفوايد عالية.. و لما الفايدة تنزل تكلفة الدين الحكومي هتقل وده معناه إن الدولة ممكن توفر مليارات كانت بتدفعها في الفوائد.
طب والسيولة في البنوك؟
البنوك بتعتمد على إن الناس تحط فلوسها عندها مقابل فوايد.. ولما الفايدة تقل.. الناس ممكن تبدأ تفكر في إنها تسحب فلوسها وتدور على طرق تانية للاستثمار.. زي شراء العقارات أو الاستثمار في البورصة.. وده ممكن يخلي السيولة تتحرك من البنوك إلى قطاعات تانية وده بيحرك الاقتصاد كله.
طب هل القرار ده ممكن يكون ليه آثار سلبية؟
أكيد! زي ما في فوائد في تحديات.. مثلا المستثمرين الأجانب اللي بيحطوا فلوسهم في أدوات الدين الحكومي المصرية عشان العائد العالي.. ممكن يلاقوا إن العائد قل.. فبالتالي ممكن بعضهم يخرج.. لكن في نفس الوقت لو الاقتصاد بقى نشيط والمخاطر قلت الاستثمار الأجنبي هيبقى أكثر استدامة مش مجرد أموال ساخنة داخلة عشان الفايدة المرتفعة.
كمان لما الفايدة بتقل الفلوس اللي محطوطة في البنوك مش هتجيب نفس العائد الكبير اللي كانت بتجيبه قبل كده.. فده ممكن يخلي بعض الناس تفكر إنها تستثمر في حاجة تانية بدل ما تسيب فلوسها في البنك.. لكن في نفس الوقت لو التضخم فعلا نزل.. مش هيبقى عندك نفس القلق من إن الفلوس تفقد قيمتها بسرعة.
