بعد تحسن وضع مصر أمام وكالات التصنيف.. هنقولك يعني إيه تصنيف ائتماني وإيه فايدته لوضع مصر؟
يا ترى ايه أهمية التصنيف الائتماني اللى الوكالات العالمية بتطلعوا؟ وإزاي التصنيف ده ممكن يغير شكل الاقتصاد بتاع بلدك؟ وليه الحكومات دايمًا بتخاف على التصنيف ده؟ ويعني إيه أصلا تصنيف ائتماني ؟
فى البداية كده لازم تكون عارف ان التصنيف الائتماني ليه دور مهم جدًا في تحريك عجلة الاقتصاد وفتح الأبواب للاستثمارات العالمية.. وفي الفيديو ده هنتكلم عن أهمية التصنيف الائتماني بشكل عام وليه الحكومات بتحرص عليه زي ما بيحرصوا على أمنهم القومي.
ممكن تكون سمعت عن "التصنيف الائتماني" قبل كده.. لكن هل فهمت تأثيره الحقيقي على حياتنا؟
خليني أسألك شوية أسئلة ممكن تفتحلك عيونك على فكرة التصنيف الائتماني بشكل مختلف. لو كان عندك شركة وعايز تاخد قرض علشان توسعها، هل هتروح للبنك اللي هيديكي القرض دا بدون ما يعرف إذا كنت هتقدر تسدد ولا لأ؟ طبعًا لأ نفس الكلام بيحصل مع الحكومات.. والحكومة لما تحاول تستلف من الأسواق العالمية.. لازم يكون فيه تقييم لقدرتها على سداد القروض دي في الوقت والمكان الصح.
أنت لو رحت لبنك علشان تستلف فلوس البنك هيسألك أسئلة زي: "هل عندك تاريخ من السداد؟" أو "هل ليك دخل ثابت؟.. طبعًا ده كله علشان يتأكد إنك هتقدر تدفع الفلوس تاني,, نفس الشيء بالظبط بيحصل مع الدول.. التصنيف الائتماني هو ببساطة التقييم ده ولكن للحكومة أو الدولة بالكامل.. و بيتم من خلال وكالات عالمية زي وكالة "موديز" و"ستاندرد آند بورز"، واللي بتقيم مدى قدرة الدولة على الوفاء بديونها المالية.
طب ليه التصنيف الائتماني مهم للحكومات؟
لو تصنيف الدولة عالي ده معناه إن الناس والمستثمرين بيثقوا في الاقتصاد بتاعها.. وده بيخلي الدولة قادرة على اقتراض الأموال بأسعار فائدة منخفضة.. يعني لو مصر مثلا عندها تصنيف ائتماني عالي الدولة هتقدر تستلف فلوس من أسواق المال العالمية بسهولة وبشروط أفضل.
لكن لو التصنيف الائتماني منخفض.. زي ما حصل مع مصر في فترات سابقة.. فده ممكن يخلي سعر الفائدة على الديون أعلى.. وبالتالي الحكومة هتضطر تدفع أموال أكتر في شكل فوائد.. ده طبعًا بيفرض عبء تقيل على الميزانية وبيقلل من قدرتها على تحسين الخدمات العامة أو بناء مشاريع جديدة.
وإزاي ده ممكن يأثر على الاقتصاد؟
أمثلة على دول زي اليونان أو فنزويلا بتوضح لنا تأثير التصنيف الائتماني المنخفض.. لما فقدت الدول دي التصنيفات الائتمانية الجيدة.. ا تعرضت لأزمات اقتصادية ضخمة.. زي ارتفاع تكاليف الديون.. وقلّة الاستثمار الأجنبي.. وبالتالي بتدخل الدول في حلقة مفرغة صعبة من الأزمات المالية.
مصر وحكاية التصنيف الائتماني:
طب وايه اخبار مصر فى القصة دي؟
في الفترة الأخيرة وكالة "موديز" للتصنيفات الائتمانية أكدت التصنيف الائتماني لمصر عند "Caa1"، لكن في نفس الوقت.. وضعت النظرة المستقبلية لمصر على "إيجابية".. وده معناه إن الوضع في تحسن وإن فبه آمال بتحسين قدرة الدولة على الوفاء بديونها في المستقبل..
وده مش بس كلام في الهوا.. لأن مصر بدأت تحقق تقدم كبير في إعادة التوازن المالي المحلي والخارجي.. ومع تخفيض قيمة العملة ورفع احتياطات النقد الأجنبي بدأت تكاليف الاقتراض في التراجع والمستثمرين بدأوا يحسوا بمزيد من الثقة في السوق المصري.. كمان لما البنك المركزي بيحافظ على سياسة نقدية مستدامة ومرتبطه بالتضخم ده بيساعد على تقليل أسعار الفائدة وتخفيف العبء على ميزانية الدولة.
