مشروع الـ7 مليار دولار.. مصر مركز الاستثمار في المنطقة
هويس الاستثمار فتح ومصر بقت مركز عالمي في جذب مليارات الدولارات في مشروعات من العيار التقيل.. ياترى إيه اللي بيحصل وإيه حكاية مشروع الـ7 مليار دولار..
مصر قدرت في السنين الأخيرة إنها تكون في مقدمة الأسواق في الشرق الأوسط جذبا للأستثمارات ومن أهم الأسواق الناشئة في تحقيق أرباح للمستثمرين ودا مجاش من فراغ لكن اتحقق بتعب السنين وجهد حكومات كتير وقيادة سياسية بتابع كل الملفات على مدار الساعة ولولا البنية الاساسية الحديثة اللي اتبنت في 10 سنين في كل المجالات مكانش هيجيلك مستمر ولولا التضحيات اللي قدمها ولاد مصر مكانش هيكون فيه استقرار ولا أمن وأمان ومفيش مستثمر هيجيب فلوسه في بلد في قلق ولا حكومة ضعيفة.
والحقيقة قطاع الاستثمار الخارجي في مصر من أهم القطاعات اللي بتقود الاقتصاد المصري حاليا لأنه قطاع بيفتح المجال لضخ أموال جديدة في كل الانشطة الاقتصادية من صناعة وزراعة وخدمات واسكان ومواني وتجارة وبتخلق الاف من فرص العمل للشباب وبتضخ الدولار في سوق الصرف وبتوفر حصيلة دولارية البلد في أمس الحاجة ليها اليومين دول وكمان الاستثمار بيمثل قيمة مضافة للاقتصاد من كل النواحي.
وعلى سبيل المثال شهدت فعاليات مؤتمر ومعرض مصر الدولي للطاقة إيجبس 2025 صفقة من العيار التقيل بين الشركة المصرية القابضة للبتروكيماويات ووزارة الاستثمار والتجارة الخارجية وشركة شارد كابيتال الإنجليزية لتنفيذ مجمع إنتاج البتروكيماويات بالعلمين الجديدة باستثمارات قيمتها 7 مليار دولار بالشراكة مع الشركة الإنجليزية ومجموعة القحطاني السعودية.. أكيد حضرتك وقفت قدام الرقم الكبير لكن في الحقيقة مشروعات البتروكيماويات بتحتاج فعلا استثمارات ضخمة لأنها صناعة استراتجية ومهمة وفي نفس الوقت العائد بتاعها بيكون كبير ومربح جدا.
كريم بدوي وزير البترول والثروة المعدنية المصري علق على الصفقة الكبرى وقال ‘ن المشروع الجديد هيساهم في تعظيم القيمة المضافة من موارد مصر لإنتاج منتجات بتروكيماوية متميزة بما يسهم في تحقيق مردود متميز للاقتصاد المصري من خلال تعظيم الإنتاج والتصدير لتحقيق عائد دولاري وتوفير مدخلات الإنتاج للصناعة بجانب توفيرالمجمع الضخم الجديد فرص واسهامات اقتصادية وتنموية وفق خطة الدولة الشاملة لتنمية منطقة العلمين.
المجمع الجديد يتبني التكنولوجيات اللازمة للاستدامة البيئية والكفاءة وفق اعلي المعايير البيئية، ودا بقي شرط مهم جدا في المشروعات اللي بالحجم دا إنها تكون صديقة للبيئة وعشان كمان المنطقة اللي فيها المشروع تفضل بنفس جمالها لأن الساحل الشمالي بيعتبر رئة الشرق الأوسط النظيفة وقريب هيكون مركز السياحة في المنطة والعالم ولأوروبا.
المشروع الجديد مفيش شك هيلفت انتباه مستثمرين كتير في العالم وهيساهم في الترويج للاستثمار في الأسواق المصرية اللي بقت قبلة المليارات.
