اشمعنا أسبانيا.. أسرار زيارة الرئيس السيسي للعملاق الاقتصادي الأوروبي
ليه الرئيس السيسي زار أسبانيا النهاردة وإيه سر رفع مستوى العلاقات بين البلدين للمستوى الاستراتيجي وإيه تأثير دا على الاقتصاد المصري.
النهاردة زي ماشفنا الرئيس السيسي زار أسبانيا والزيارة نقدر نقول عليها تارخية لأكتر من سبب أولها إن وصول رئيس مصر لأسبانيا في حد ذاته حدث كبير لأن مصر بوابة أوروبا القوية في الجنوب وتاني حاجة لأن الاستقبال والحفاوة كان كبير بالرئيس السيسي في العاصمة مدريد ولان الزيارة جت في وقت منطقة الشرق الأوسط كلها بتمر بمرحلة صعبة جدا وهيكون ليها تأثير مباشر على أوروبا ومصر بتلعب دور رئيسي في حلها يعني أووربا عاوزة تسمع الجديد من رئيس مصر وأخر سبب لأهمية زيارة السيسي لأسبانيا هي ترفيع العلاقات بين البلدين لمستوى العلاقات الاستراتيجية.
طيب يعني إيه ترفيع العلاقات بين بلدين.
يعني تقدر تقول كده ببساطة إن مصر هيكون ليها الأولوية عند المستثمر الاسباني والحكومة هناك وهيكون في نقاش وحوار مستمر وليه آلية معروفة لزيادة التعاون في كل المجالات بشكل سنوي يعني مصر هيكون ليها الأولوية في التعاون الاقتصادي مع اسبانيا وفي كل القطاعات سواء صناعة أو زراعة أو تصدير أو توطين الشركات الاسبانية في مصر ودا غير التسهيلات التجارية اللي هتكون بين البلدين وفتح أسواق جديدة للمنتجات المصرية بميزات خاصة.
وعشان نعرف ليه أسبانيا بالذات اللي الرئيس زاره اليومين دول .. لازم تعرف إن الناتج المحلي لاسبانيا وصل 1.6 تريليون دولار وهي في المركز السادس كأقوى اقتصاد في أوروبا وغير إن اسبانيا من أكبر الدول في قطاع السياحة العالمي واللي مصر تقدر تقول بتفتح فيه سكة مع أسبانيا عشان تستفاد من خبراتها ومن التسويق لمصر وزيادة التدفق السياحي وكفاية تعرف أسبانيا بتستقبل حوالي 60 مليون سايح تقريبا في السنة وتقدر تتخيل حجم السوق السياحي عندهم قد إيه وعدد الشركات والفنادق اللي شغالة في القطاع وإزاي ممكن مصر تستفيد من دا كله.
النهاردة الرئيس عبدالفتاح السيسي شهد مع ورئيس الوزراء الاسبانى بيدرو سانشيز توقيع عدد من الاتفاقيات بين البلدين ودا غير إن الرئيس السيسي اجتمع مع ممثلي عدد من كبرى الشركات الإسبانية بجانب مشاركته في فعالية اقتصادية مع مجتمع الأعمال والشركات الإسبانية.
الرئيس استقبل رؤساء وممثلي شركات أسبانية في مجال بناء السفن وصيانتها ونظم الطاقة المتجددة وكمان شركات متخصصة في قطاع الفنادق والسفر والنقل والتكنولوجيا والطاقة وغيرها واستعرض الرئيس الفرص الاستثمارية الواعدة في السوق المصرية بمختلف القطاعات وتشجيع الشركات الاسبانية على التوسع في السوق المصرية وتعزيز استثماراتها، والاستفادة من تلك الفرص المتاحة بمصر.
وعلى فكرة إسبانيا هي تاني أكبر مستقبل للصادرات المصرية في 2024 بمليار و532 مليون دولار وبيوصل حجم الاستثمارات الاسبانية في مصر دلوقتي حوالي مليار يورو تقريبا وطبعا هيتم مضاعفتها بعد زيارة الرئيس الأخيرة.
