مرشحة للزيادة.. أسعار الذهب رايحة فين قبل شهر رمضان؟
ناس كتير بتسأل علي اسعار الذهب رايحة علي فين، خصوصا أننا داخلين علي شهر رمضان وبعده العيد واللي بتكثر فيه الهدايا وحفلات الخطوبة والزواج.
في الفترة الحالية اسعار الذهب في مصر حققت ارقام قياسية عمره ما وصلت لها قبل كده، والاسعار مكملة في الصعود، حتي لو انخفضت بتكون بمبالغ بسيطة ولكنها بتعاود الصعود بارقام كبيرة، وحاليا كل الناس بتسال عن اسباب الزيادات الرهيبة في الأسعار، وهل الذهب هيفضل مكمل في الزيادة كده وهل الذهب هيرجع ينخفض تاني، وهل الوقت الحالي مناسب للشراء.
كل الأسئلة اللي بتدور في دماغك دي جاوبت عليها شعبة الذهب واللي اكدت ان ارتفاع اسعار الذهب في مصر وراها التوترات التجارية بسبب الرسوم الجمركية الجديدة اللي اقرها الرئيس الأمريكي دونالد ترامب علي البضائع والسلع اللي بتدخل السوق الأمريكي، واللي ردت عليها الصين ودول الاتحاد الأوروبي انها مش هتعدي بالساهل كده وأنه هيكون عليها رد في الوقت المناسب.
التوترات التجارية الحالية بين الولايات المتحدة والصين ودول الاتحاد الاوروبي خلت عدد كبير من البنوك المركزية في عدد كبير من دول العالم يقرر أنه يحول مدخارته واحتياطاته النقدية لسبائك ذهبية خصوصا الصين واللي قدرت أنها تجمع نسبة كبيرة من مدخارتها لسبائك ذهبية، ده غير أن التوترات دي خلت عدد تاني من الدول لزيادة احتياطاتها الدولارية في البنوك، خصوصا أن محدش عارف التوترات التجارية دي هتوصل لأيه.
طيب التوترات التجارية ماله ومال اسعار الذهب عندنا؟.
التوترات التجارية اللي موجودة دلوقتي اثرت علي حركة التجارة العالمية بشكل كامل، وطبعا التاثير ده له صدي عندنا في مصر، واسعار الذهب عندنا في مصر ارتفعت متاثره بالاسعار العالمية، والتوترات دي بروضوا السبب الاساسي في ارتفاع اسعار صرف العملات الأجنبية في البنوك الوطنية.
شعبة الذهب قالت ان الاسعار في مصر مرشحة للارتفاع في الوقت اللي جاي طول ما التوترات التجارية موجودةن ونصحت المواطنين اللي عايزين ينزلوا يشتروا ذهب بالنزول للشراء فورا وعدم الانتظار خصوصا أن الاسعار مرشحة للزيادة في حالة تصاعدات التوترات التجارية واللي بتهدد الاقتصاد العالمي بشكل كامل.
