بريكس تتحدى ترامب.. إيه اللي هيحصل في يوليو الجاي
ترامب من ساعة ماوصل لرئاسة أمريكا وكل يوم يطلع تصريحات وتهديدات ضد الدول وفرض فعلا رسوم على دول كتير منها كندا والصين واليابان واستراليا.. كمان ترامب هدد دول البريكس صراحة في حالة لجوءها للاستغناء عن الدولار في تعاملاتها وقال إنه هيفرض رسوم على بضايع الدول الاعضاء في البريكس هتوصل لـ100 %.
ترامب محترف تهديدات ورغم إنه عارف إنه مايقدرش يحارب العالم كله في مسألة الاقتصاد والتجارة لكن موقفه بيدل على حاجة مهمة جدا وهي خوفه من تحركات بريكس للتخلي عن الدولار وبيقول إن البريكس ممكن تهز فعلا عرش الوحش الأمريكي الأخضر.
عامة البريكس مطلعتش بيان رسمي ترد بيه على ترامب لكن الرد هيكون في يوليو اللي جاي ودا بعد إعلان وزير الخارجية البرازيلي ماورو فييرا إن قمة زعماء مجموعة بريكس هتعقد يومي 6 و7 يوليو في ريو دي جانيرو.
وحاليا البرازيل بتتولي الرئاسة الدورية للمجموعة حاليا واللي بتضم اقتصادات ضخمة زي روسيا والهند والصين وجنوب إفريقيا ومصر والامارات ونيجيريا.
وحسب المسءول البرازيلي مدينة ريو دي جانيرو هتستقبل رؤساء الدول العشرين اللي بتشكل مجموعة بريكس في فئتي الدول ذات العضوية الكاملة والدول الشريكة وقال إنه في الاجتماع الجاي هيتم اتخاذ قرارات مهمة جدا لتنمية كل البلدان الاعضاء والتعاون وتحسين الظروف المعيشية لجميع السكان.
وفي بيان لحكومة البرازيل أكدت إن مجموعة بريكس هتركز خلال فترة تولي البرازيل رئاستها على تعزيز التعاون بين دول الجنوب وإصلاح المؤسسات متعددة الأطراف وإن من بين أولوياتها تطوير وسائل الدفع لتسهيل التجارة والاستثمار بين الدول الأعضاء.
ورغم إنه مفيش خطة زمنية واضحة أو تصور لإصدار عملة دولية بديلة للدولار لكن الموضوع قيد البحث في مجموعة بريكس وإن الدول الاعضاء هشتوف مصلحتها فين وهتعمله زي ما الولايات المتحدة بتدافع عن مصالحها وعشان كده لازم نعرف إن ترامب توسع في استخدام الدولار في العقوبات على الدول ودا هيخلي البريكس تفكر جديا في تسريع اصدار عملة موحدة أو على الاقل اعتماد نظام دفع نقدي بعيد عن الدولار وزيادة الاعتماد عل العملات الوطنية في التبادل التجاري بين دول البريكس وكل الافكار دي بتمثل ضربة قوية للدولار الأمريكي وبيظهر قوة البريكس القادمة.
ولو متعرفش مجموعة بريكس فهي تأسست في سنة 2009، وتوسعت لتضم دول جديدة زي إندونيسيا وإيران ومصر والإمارات العربية المتحدة، بالإضافة إلى عشرات الدول الشريكة وبينها كوبا وبوليفيا ونيجيريا والجزائر وتركيا وبتضم تقريبا نص سكان الأرض وفيها أسواق ضخمة جدا وموارد بشرية وطبعيعية وثروات تخليها قوة عالمية ضخمة.
