معركة الدولار الكبرى.. مواجهة ساخنة بين ترامب ودول بريكس
يا ترى هل ممكن فى يوم من الأيام نشوف نهاية لسيطرة الدولار على الاقتصاد العالمي؟ وليه ترامب مرعوب من فكرة عملة جديدة لدول بريكس؟ وإيه اللي بيحصل في الكواليس بين أمريكا ودول بريكس؟
فى الأيام الأخيرة فيه مواجهة محتدمة بين الرئيس الأمريكي دونالد ترامب ودول مجموعة بريكس واللي ممكن تغير شكل الاقتصاد العالمي تمامًا.. الرئيس الأمريكي هدد بفرض رسوم جمركية بنسبة 100% على دول بريكس لو فكروا يستبدلوا الدولار بعملة جديدة.
وزي ما كلنا عارفين دول بريكس اللي بتضم البرازيل، روسيا، الهند، الصين، جنوب أفريقيا، مصر، الإمارات، إثيوبيا، وإيران، بيفكروا في تقليل اعتمادهم على الدولار في التجارة العالمية.
طب ليه ترامب خايف؟
الدولار الأمريكي هو العملة الرئيسية في التجارة العالمية والاحتياطيات النقدية.. ولو دول بريكس نجحوا في إنشاء عملة بديلة ده هيقلل الطلب على العملة الأمريكية وده ممكن يضعف الاقتصاد الأمريكي.. وترامب شايف إن الخطوة دي تهديد مباشر لهيمنة أمريكا الاقتصادية وعلشان كده بيهدد بعقوبات اقتصادية قاسية.
وليه أصلا دول بريكس بتفكر في عملة بديلة؟
فيه اسباب كتير لتفكير دول بريكس فى استحداث عملة بدلية للدولار.. زي مثلا تجنب العقوبات الأمريكية.. دول زي روسيا وإيران اتعرضوا لعقوبات اقتصادية، وعايزين يقللوا اعتمادهم على الدولار لتفادي التأثيرات السلبية.. كمان تعزيز الاستقلال الاقتصادي لأن بإنشاء عملة خاصة، دول بريكس هتقدر تتحكم في سياساتها النقدية بعيد عن تأثيرات الدولار.. بالاضافة لحاجة مهمة وهي تنويع الاحتياطيات بدلا من الاحتفاظ بالدولار فقط.. الدول دي عايزة تنوع احتياطياتها بعملات تانية لتقليل المخاطر.
و هل فعلاً دول بريكس هتقدر تنهي سيطرة الدولار؟
الموضوع مش سهل ومش هيحصل بين يوم وليلة.. فيه تحديات تقنية وسياسية وإنشاء عملة جديدة محتاج تنسيق كبير بين الدول دي وحل مشاكل تقنية وسياسية معقدة..كمان عشان العملة تنجح لازم الدول والشركات تثق فيها وتستخدمها في التعاملات وده محتاج وقت.. وخد بالك انه رغم التحديات الكبيرة الاقتصاد الأمريكي لسه من أكبر الاقتصادات في العالم، والدولار لسه مسيطر.
طب ايه ردود الفعل على تهديدات ترامب بفرض رسوم جمركية على دول بريكس؟
الكرملين رد على تهديدات ترامب وقال إن دول بريكس مش بتخطط لإنشاء عملة موحدة.. وإن التركيز دلوقتي على إنشاء منصات استثمار مشتركة.. وده معناه إن الفكرة لسه في مراحلها الأولى، ومفيش حاجة رسمية لحد دلوقتي.
الخلاصة.. المواجهة بين ترامب ودول بريكس هي جزء من صراع أكبر على النفوذ الاقتصادي العالمي.. وفكرة إنشاء عملة بديلة للدولار هي خطوة جريئة لكنها مليانة تحديات ومعوقات.. فيا ترى هل هنشوف اليوم اللي تنتهي فيه سيطرة الدولار.. ممكن طبعا ده يحصل لكن مش في المستقبل القريب.. لسه الطريق طويل ومليان عقبات.
