الصفقة المنتظرة.. تعاون مصري قبرصي هيقلب الموازين في سوق الغاز
يا ترى إيه اللي ممكن يحصل لما مصر توقع اتفاقية مع قبرص لتوريد الغاز من حقل "أفروديت"؟ وإزاي ده هيأثر على تشغيل الكهرباء والمصانع في مصر؟ وايه أهمية الاتفاقيات اللى من النوع ده؟
في خطوة جديدة لتعزيز قطاع الطاقة.. مصر وقبرص بيستعدوا لتوقيع اتفاقية مهمة لتوريد الغاز الطبيعي من حقل "أفروديت" القبرصي لمصر.. الاتفاقية دي مش بس هتزود إمدادات الغاز لكنها كمان هتدعم تشغيل محطات الكهرباء والمصانع في مصر.
ومصر كانت وقعت في فبراير 2018 اتفاق مع قبرص لمد خط أنابيب بين البلدين لنقل الغاز من حقل أفروديت القبرصي.. وبتسعى مصر لاستغلال السعة المتاحة بتسهيلات حقل "ظهر" من خط أنابيب ومحطة معالجة الغاز البرية، بعد الانخفاض الطبيعي لإنتاج المشروع لنحو 1.6 مليار قدم مكعب غاز يومياً مقارنة بنحو 3.2 مليار قدم في 2020.
وبتأتي محاولات مصر لتسريع المحادثات وبدء العمل في خط الربط مع قبرص وسط انخفاض سريع بإنتاج الغاز دفع الحكومة لاستيراد حوالي 41 شحنة من السنة اللى فاتت لتلبية الطلب القوي على الغاز الطبيعي.
طب ايه تفاصيل الاتفاقية؟
الاتفاقية المنتظرة هتتضمن نقل الغاز من حقل "أفروديت" اللي بيحتوي على احتياطيات بتتراوح بين 3.6 و6 تريليون قدم مكعب لمصر عبر خط أنابيب بحري بطول 90 كيلومتر.. الخط ده هيربط الحقل بتسهيلات الإنتاج في حقل "ظهر" داخل المياه الإقليمية المصرية.. وده هيسمح بضخ الغاز في الشبكة القومية للغازات.
وايه أهمية الاتفاقية لمصر؟
الاتفاقية دي ليها أهمية كبيرة جدا لمصر في أكتر من جانب.. منها تعزيز إمدادات الطاقة.. لأن مع زيادة الطلب على الطاقة خاصة في فترات الصيف الاتفاقية هتوفر مصدر إضافي للغاز الطبيعي.. وده هيساعد في تلبية احتياجات محطات الكهرباء والمصانع.
كمان الاتفاقية فيها دعم للاقتصاد.. لأن زيادة إمدادات الغاز هتقلل من الحاجة لاستيراد الوقود وده هيوفر عملة صعبة ويقلل الضغط على الميزانية العامة.. بالاضافة لتحسين البنية التحتية .. ومع ربط حقل "أفروديت" بتسهيلات حقل "ظهر" ده هيعزز من كفاءة واستغلال البنية التحتية الحالية.. وده هيساهم في تقليل تكاليف النقل والمعالجة.
وايه تأثير الاتفاقية على تشغيل الكهرباء والمصانع؟
زيادة إمدادات الغاز الطبيعي هتساهم في استقرار تشغيل محطات الكهرباء من خلال توفير كميات كافية من الغاز ده هيضمن تشغيل مستمر وفعال لمحطات توليد الكهرباء وهيقلل من احتمالات انقطاع التيار الكهربائي.
كمان ه هيساع في دعم القطاع الصناعي.. وزي ما كلنا عارفين المصانع فى مصر بتعتمد بشكل كبير على الغاز الطبيعي كمصدر للطاقة.. و زيادة الإمدادات هتساعد في تشغيل المصانع بكفاءة أعلى وزيادة الإنتاجية.
والاتفاقية دي بتمثل نموذج للتعاون الإقليمي في مجال الطاقة بين دول شرق المتوسط.. مصر بتسعى إنها تكون مركز إقليمي لتجارة وتداول الغاز.. والاتفاقيات دي بتدعم الهدف ده من خلال تعزيز الشراكات مع الدول المجاورة.
خلاص الكلام توقيع الاتفاقية بين مصر وقبرص لتوريد الغاز من حقل "أفروديت" خطوة استراتيجية هامة.. والاتفاقية هتعزز من إمدادات الطاقة وتدعم تشغيل محطات الكهرباء والمصانع وكمان هتقوي التعاون الإقليمي في مجال الطاقة.
