لو انت منهم.. شوف مرتبك هيزيد امتى؟
مصر حاليا بتجهز حزمة حماية اجتماعية كبيرة وفيها الرواتب هتزيد بشكل كبير، ياتري الرواتب هتوصل لكام.. وامتي حزمة الرعاية دي هتوصل للمواطنين.. وليه مصر اختارت الوقت ده علشان تعلن عنها.
علي مدار كل السنين اللي فاتت الحكومة أثبتت أنها علي طول أنها في صف المواطن، وفي عز ما الأزمات اللي بتكون فيها مصر، الحكومة برضوا بتكون عيونها علي المواطن، والعين بتكون من خلال توجيه رئاسي بإعداد حزمة رعاية اجتماعية لزيادة المرتبات والمعاشات والهدف منها دعم الفئات محدودية ومتوسطة الدخل.
السنة اللي فاتت وتحديدا في بدايتها وكانت مصر بتعاني من نقص شديد جدا في العملات الأجنبية بالبنوك، وكانت السوق السودا شديدة جدا وكانت عبارة عن وحش بيهدد الاقتصاد المصري، ودي كانت بتعد من أكبر الأزمات اللي مرت علي تاريخ الاقتصاد المصري، وفجأة الرئيس عبدالفتاح السيسي وجه الحكومة بإعداد اكبر حزمة رعاية اجتماعية في التاريخ، بقيمة 180مليار جنيه.
حزمة الرعاية الاجتماعية اللي أقرتها الحكومة شملت تخصيص 6 مليارات جنيه لتعيين 120 ألف من أعضاء المهن الطبية والمعلمين والعاملين بالجهات الإدارية الأخرى، وتخصيص 15 مليار جنيه زيادات إضافية للأطباء والتمريض والمعلمين وأعضاء هيئة التدريس بالجامعات، وتخصيص8.1 مليار جنيه كزيادة إضافية لأجور المعلمين بالتعليم قبل الجامعى، وتخصيص 1.6 مليار جنيه زيادة إضافية لأعضاء هيئة التدريس ومعاونيهم بالجامعات والمعاهد والمراكز البحثية، وتخصيص 4.5 مليار جنيه زيادة إضافية لأعضاء المهن الطبية وهيئات التمريض.
طيب اية الجديد في دور الدولة لحماية محدودي ومتوسطي الدخل ؟
مفيش سنة مرت بعد ما الحكومة أقرت أكبر حزمة رعاية للمواطنين الا القيادة السياسية وجهت الحكومة بإعداد حزمة رعاية اجتماعية لمحدودي ومتوسطي الدخل، والحزمة دي هيبدا العمل بها قبل شهر رمضان اللي جاي يعني اقل من 20 يوم والمواطنين هيبدوا يحسوا بيها.
وحاليا الحكومة ممثلة في وزارة المالية بتحط تصور لحزمة الرعاية الاجتماعية وهيتم عرضها علي الرئيس السيسي بعد الانتهاء من وضع بنودها وفي حالة الموافقة عليها هيتم إعلانها والعمل بيها علي طول، والهدف من الحزمة دي الهدف منها تخفيف حدة الأزمة الاقتصادية الموجودة حاليا اللي بقت موجودة في مصر بسبب الظروف الاقتصادية اللي بيمر بيها العالم ومصر واحدة من أكبر الدول اللي تأثرت بالازمة دي.
