ايه الخطر اللي الحكومة عملت حسابه.. شوف المفاجأة
هو ليه مصر بتستورد كميات قمح كبيرة خلال الفترة اللي فاتت وليه هترفع الكميات الموردة من المزارعين في الموسم الجاي وايه علاقة دا باللي بيحصل في الأسواق العالمية..
لو حد متابع أرقام الاستيراد هيعرف إن الحكومة استوردت كميات كبيرة من القمح وصلت لاكتر من 3 مليون طن ولما رئيس الوزراء الدكتور مصطفى مدبولي اتسأل عن السر في استيراد الكمية دي كلها قال إن مصر بتستعد لاسوأ السيناريوهات المحتملة والتوتر العالمي بسبب قرارات ترامب واحتمال ارتفاع الأسعار العالمية وفي نفس الدولة مش هتسيب حاجة للصدفة خاصة في لقمة عيش المصريين وعشان كده الاحتياطي الاستراتيجي من القمح دايما على رأس أولويات الحكومة المصرية ودا لتأمين الأمن الغذائي للمصريين.
والحكومة كمان بتستهدف زيادة شراء القمح من المزارعين في الموسم الجديد بنحو 11% إلى 4 مليون طن في موسم الحصاد اللي هيبدأ منتصف أبريل الجاي بحسب وزير التموين شريف فاروق وزي ما احنا عارفين موسم زراعة القمح في مصر بيبدأ خلال منتصف شهر نوفمبر اللي فات وحتى نهاية يناير، في حين يبدأ الحصاد من منتصف أبريل ولغاية منتصف يوليو وبيوصل إجمالي مساحة الأرض المزروعة منه ما يصل إلى 3.1 مليون فدان.
وحسب وزير الزراعة الحكومة بتستهدف استيراد 6 ملايين طن قمح من الخارج خلال العام الحالي وبحسب الأرقام قفزت واردات مصر من القمح لأعلى مستوى منذ 10 سنين خلال عام 2024، لتصل إلى 14.2 مليون طن بزيادة بلغت 31% وبلغ نصيب الحكومة المصرية منها 6.2 مليون طن بزيادة 30% عن عام 2023 في وقت بيوصل إجمالي الاستهلاك المصري من القمح لـ20 مليون طن، ومن المتوقع استهلاك نفس الكمية السنة الحالية.
خطة توريد القمح رفعت مدة الاحتياطي الاستراتيجي ل6 اشهر تقريبا لأن الأوضاع اللي حولينا تخوف بجد ومحدش ضامن بكرة هيحصل ايه والقمح عند المصريين سلعة لايمكن الاستغناء عنها وتأمينها يعني تأمين لقوت ملايين المصريين لأنها سلعة بتدخل في صناعة رغيف العيش والمخبوزات والمكرونة وصناعات تانية كتير.. وكمان تأمين احتياطي ضخم من القمح هيخفف من اي ضغوط اقتصادية ممكن تتعرض ليها مصر في الفترة الجاية مع التوترات الإقليمية في المنطقة والضغط الأمريكي الأخير بخصوص مخطط تهجير الفلسطينيين وعشان كده الحكومة اتحركت بدري اووي عشان تقطع الطريق على اي ضغوط.
كمان الحكومة اتحركت في اتجاه تاني عشان توفر القمح للمصريين وتقلل الفاقد منه وتزود المدد الزمنية للتخزين من خلال مشروع قومي لإنشاء الصوامع الحديثة وتضمن المشروع القومي للصوامع إنشاء 50 صومعة لتخزين القمح والغلال يتم فى 17 محافظة، بطاقة تخزينية تصل إلى 1,5 مليون طن وارتفعت السعة التخزينية فى الصوامع إلى ما يقرب من 4 مليون طن مع التوسع فى إنشاء صوامع جديدة وتوفير نسبة الهدر واللي وصلت إلى 15% سنويا وهي كمية ضخمة مقارنة بحجم الاقماح المخزنة.
