زلزال في سوق الدهب.. ايه اللي هيحصل في الصاغة المصرية
هو إيه اللي حصل النهاردة في سوق الدهب العالمي وايه تأثيره على سوق الصاغة في مصر وهل الارتفاع الجنوني هيستمر في الفترة الجاية والاسعار ممكن توصل كام.
فاكرين من حوالي 5 شهور لما اتكلمنا هنا في بانكير وقلنا خلوا بالكم الدهب سعره هيولع في بدايات 2025 وهيفصل يزيد لبدايات 2026 .. اهو النهاردة اللي قلنا عليه حصل وبيحصل وساعتها قلنا لحضراتكم أسباب الارتفاع المستمر في أسعار المعدن الأصفر وقلنا بسبب الأزمات والصراعات الجيوسياسية في المنطقة وفي روسيا والحرب التجارية بين الصين وأمريكا وارتفاع مشتريات البنوك المركزية العالمية وخاصة البنك الصيني من الدهب واللي وصل لمستويات قياسية والبنوك المركزية اشترت ألف طن دهب في السنة اللي فاتت واستمرار نسب المشتريات المرتفعة لغاية دلوقتى.
لكن ساعتها مكناش عارفين إن ترامب هيفوز برئاسة الولايات المتحدة الأمريكية وهيشعل السوق اكتر بقراراته العنترية والي هتصاعف الإقبال على الدهب باعتباره الملاذ الآمن للدول خاصه مع الارتفاع الكبير في أسعار الدولار وتوتر حركة التجارة الدولية وزيادة الأسعار المتوقعة في السلع نتيجة قرارات ترامب بفرص رسوم على واردات أمريكا وفرض عقوبات جديدة على عدد من الدول.
و النهاردة ارتفعت أسعار الدهب لمستوى قياسي بعد إعلان الرئيس الأميركي دونالد ترمب عزمه فرض رسوم جمركية على واردات الصلب والألمنيوم ودا زاد من حالة عدم اليقين في الأسواق المالية العالمية وصعد المعدن النفيس إلى ذروة غير مسبوقة متجاوزاً 2896 دولاراً للأونصة، بعد تسجيل ارتفاع 2.2% الأسبوع اللي فات نتيجة التهديدات التجارية الأحدث اللي أطلقها ترمب الطلب على أصول الملاذات الآمنة.
طيب ايه تأثير دا على سوق الدهب المصري ؟
طبعا اي ارتفاع في اسعار الدهب عالميا معناه زيادة سعره في الصاغة المصرية وشفنا عيار 21 ازاي تخطي حاجز ال49 آلاف جنيه بالمصنعية وللاسف التطورات الأخيرة في سوق الدهب العالمي بتقول إن فيه زيادات كبيرة جاية في السوق المصري ودا لأن نسبة كبيرة من الدهب بتيجي من بره والدفع بالدولار وخاصة مع التوقعات اللي بتقول إن سعر الدهب العالمي ممكن يوصل ل3 آلاف دولار بوتيرة أسرع من التوقعات السابقة قبل وصول ترامب.
دلوقتي الفرصة لسه متاحة للاستثمار في المعدن الأصفر مع الزيادات المتوقعة ودلوقتي الوقت مناسب للشراء رغم ارتفاع الأسعار ودا لأن الأسعار لسه هتزيد وممكن نلاقي عيار 21 الاكتر شعبية في السوق المصري هيقرب من ال5 آلاف جنيه ودا وارد مع استمرار سياسات ترامب العقابية والقفزة في شراء الدهب من البنوك المركزية العالمية.
