رقم ضخم.. مصر هتسدد كام من ديونها في فبراير؟.. وهتجيبهم منين؟
مصر في 2024 عملت انجاز وسدد كل الالتزامات اللي عليها بالنسبة للديون الخارجية، بس هل ياتري مصر هتكون قادرة علي دفع ديونها في 2025.. واجمالي الديون الموجودة عليها بتوصل لكام دلوقتي.
مصر واحدة من الدول اللي عليها ديون كبير لعدد كبير من الجهات الخارجية.. واحدة من الجهات دي هيا صندوق النقد الدولي واللي له ارقام كبيرة عند الدولة المصرية، وعلي فكرة الديون دي مش حصيلة للحكومة الحالية، لا دي تراكمات لسنين طويلة وقروض اخذتها الدولة علي مدار السنين اللي فاتت.
مصر في 2024 قدرتها أنها تسدد ديون خارجية يقيمة 38.7 مليار دولار، وده كان تحدي كبير للدولة المصرية منهم 7 مليار دولار سددتهم الدولة في شهري نوفمبر وديسمبر 2024، والحكومة أكدت أنها متلزمة بسداد كل التزامتها الخارجية، ومش هتتخلف يوم واحد من سداد كل الديون الخارجية اللي موجودة عليها، أون المبلغ اللي هتدفعه الدولة في 2025 هيكون اقل من الرقم اللي دفعته الدولة في 2024 .
طيب مصر هتسدد كام كديون خارجية في 2025؟.
البنك المركزي المصري أكد أن الدين الخارجي المصري تراجع لـ152.9 مليار دولار بنهاية يونيو 2024، والدين الخارجي طويل الأجل تارجع لـ 126.8 مليار دولار بنهاية يونيو 2024، والديون قصيرة الأجل سجلت 26.24 مليار دولار في نفس العام .
الحكومة المصرية هتكون ملزمة بسداد661.6 مليون دولار لصندوق النقد الدولي في شهر فبراير الحالي، والحكومة سددت في شهر يناير اللي فات 252.6 مليون دولار، وهيوصل القيمة اللي هتسددها الدولة في يناير وفبراير لـ914.2 مليون دولار .
طيب مصر هتجيب الفلوس دي منين علشان تسد الديون الموجودة عليها؟.
مصر حاليا في انتظار صرف الشريحة الرابعة لصندوق النقد الدولي من قرض الـ8 مليار واللي الحكومة اخذت موافقته في مارس 2024، وفعلا مصر صرفت منه علي مدار السنة اللي فاتت 3 شرائح، وحاليا الدولة في انتظار الشريحة الرابعة واللي هتوصل لـ1.2 مليار دولار، ده غير أن مصر كمان في انتظار صرف باقي القيمة اللي اقرها الاتحاد الأوروبي لمصر واللي هتوصل لـ4 مليار دولار، من القيمة اللي اقرتها الدول الموجودة في الاتحاد نتيجة استضافة عدد كبير من الوافدين لبعض الدول الخارجية.
مش كده بس لا ده كمان، الناتج القومي المصري هيستقبل دفعات كبيرة من عدد كبير من القطاعات الموجودة في الدولة المصرية زي قطاع السياحة واللي قدر يحقق في 2024 اكثر من 15 مليار دولار كايرادات للقطاع، ده غير العودة التدريجية الكبيرة اللي بدأت ترجع لقناة السويس واللي هيا أهم مجري بحري في العالم بعد ما الأوضاع الجيوسياسية في الشرق الأوسط بدأت تهدا وترجع لطبيعتها وده هيخلي حركة الملاحة البحرية ترجع هيا كمان لطبيعتها خصوصا أن الحركة الملاحية تاثرت بنسبة 70% بسبب الضربات اللي كانت بعض الجهات بتنفذها علي السفن وقت عبورها في البحر الأحمر.
