خبر محدش خد باله منه.. صناعة البراندات المصرية
فيه خبر محدش خد باله منه في الكام ساعة اللي فاتوا لكن ليه تأثير قوي جدا على مستقبل الاقتصاد المصري وهيقلب الموازين ويحط مصر على أول طريق صناعة البراندات المصرية.. يا ترى إيه الحكاية.
الخبر بيقول إن الحكومة المصرية بتستعد لإطلاق كيان تمويلى ضخم هيكون مشترك بين الحكومة والقطاع الخاص لتمويل الشركات الناشئة وحسب التفاصيل الخطوة الجديد بتهدف إلى دعم الشركات الناشئة، وفتح الطريق لمزيد من الاستثمارات فى القطاع الحيوي.
لو سألتنا إيه أهمية الخبر دا.. هقول لحضرتك إن الشركات الصغيرة أو الناشئة هي عصب أي اقتصاد ومصدر قوته لان الشركات دي بتتحول مع الوقت لكيانات عملاقة وكل الشركات الضخمة في العالم كانت في الأصل مشروع شركة صغيرة لكن مع الدعم والتشجيع وتوفير الأسواق والتطوير المستمر قدرت إنها تكبر وتصنع براندات وقيمتها السوقية وصلت لتريليونات الدولارات زي شركات أبل وميتا في أمريكا كده ومرسيدس في ألمانيا وسامسونج في كوريا وغير ها مئات البراندات العالمية اللي قدرت تبقي وحوش اقتصادية في بلادها وكمان تتوسع عالميا.
مصر حطت إيدها على أهم نقطة في صناعة اقتصاد قوي وهو توفير الدعم المالي والفني من خلال كيان مالي ضخم يضمن ليها الاستمرارية والتوسع وهنشوف شركات مصرية هيكون ليها براندات خاصة بيها ومع الأيام هتكبر وتتمدد بره الحدود.
طيب ما هي البنوك بتمول الشركات؟
صحيح البنوك جزء أساسي في عملية دعم الشركات الناشئة لكن هنا بنتكلم عن كيان هيمول ويستثمر في الشركات دي زي ما بيحصل في أوروبا وأمريكا وهيكون تركيزها منصب أساسا على دعم الشركات اللي لسه بتبدأ المشوار والأهم ان الخطوة دي جت في وقت مناسب بيشهد فيه قطاع الشركات الناشئة نمو مطرد فى مصر وتوفير فرص عمل للشباب، يعكس إطلاق الكيان حرص الحكومة المصرية على توفير الدعم المالى اللازم لتنمية هذا القطاع، ومساعدته على تحقيق المزيد من النجاحات.
المعلومات بتقول إن هيئة الاستثمار قامت بتجميع كافة الشركات اللي بتتعامل مع الشركات الناشئة داخل وحدة ريادة الأعمال والشركات الناشئة التابعة للهيئة، ودا بهدف وضع آلية للتعامل مع التحديات التى تواجههم ودا بعد اكتشاف إن أبرز التحديات اللى بتواجه الشركات الناشئة هى التمويل وتعرض بعض الشركات لغرامات التأخير من القروض اللي بتاخدها.
عشان كده الهيئة قررت وضع آلية واضحة للتعامل مع التحديات دي وتذليل العقبات أمام نمو وتطور الشركات الناشئة
وبنفكركم إن الدكتور مصطفى مدبولى رئيس مجلس الوزراء أعلن إنه فيه حزمة تسهيلات ومزايا للشركات الناشئة والإعلان عن حزمة تمويل كبيرة جدًا للشركات الناشئة للتوسع فى أعمالها الفترة الجاية.
