تحسن ملحوظ وانفراجة قريبة.. مصر تودع زمن الأزمات الكبرى
هل ممكن الاقتصاد المصري يعمل الانفراجة اللي كلنا مستنينها؟ و إيه اللي بيحصل في السوق المصري الفترة الأخيرة؟ وليه الحكومة بتتكلم عن خطط ضخمة لجذب استثمارات أجنبية؟ وهل دي مؤشرات على تحسن حقيقي؟.. تعالوا نعرف التفاصيل اللي ممكن تغير شكل المستقبل الاقتصادي لمصر
من كام يوم وزير المالية أحمد كجوك أعلن إن الصناعة والاستثمار هم عماد الاقتصاد المصري.. وقال ان الحكومة شغالة بكل قوتها عشان تدعم القطاعين دول وتنميهم والنتايج بدأت تبان قدام عنينا.
طيب، إيه اللي هيحصل في الأيام الجاية؟
الحكومة بتعمل تنسيق مشترك بين وزارة المالية ووزارة الاستثمار عشان تحط منظومة جديدة ومتكاملة تدعم القطاعات التصديرية… و الاستراتيجية هي إننا نرفع صادراتنا ونوصلها لأسواق جديدة في العالم.. وده مش بس هيساعد الاقتصاد ينمو لكن كمان هيوفر فرص عمل كتير للشباب ويحسّن من مستوى المعيشة.
والأخبار الكويسة مش بتقف عند كده.. في الفترة الجاية الموازنة الجديدة هتكون أكتر توازنًا.. ودي خطوة مهمة عشان الحكومة تضمن دعم أكبر للمواطن العادي.
ووزي رالمالية بيأكد إن الدعم هيكون واضح خصوصًا في قطاع السياحة اللي هو من أهم الركائز الاقتصادية في مصر.. يعني شوية وقت كده والسياحة هتكون في مستوى جديد.. وهتلاقي البلد مليانة حياة ورحابة والضيوف من كل حتة هيكتروا.
ومن هنا بقى نخش على موضوع جذب الاستثمارات الأجنبية.. الحكومة عاملة شغل جامد لتقديم حزمة تيسيرات ضريبية جديدة تشمل 20 إجراء لتسهيل الأمور على الممولين ومجتمع الأعمال.. الإجراءات دي مش مجرد كلام على ورق.. دي خطوات عملية هتخلي المستثمرين يحسوا إن مصر بقت أرض خصبة للاستثمار.
ومش بس كده.. وزارة المالية دلوقتي شغالة على إعداد حزمة تيسيرات جمركية لخدمة حركة التجارة.. يعني كل حاجة بتتحرك بسرعة عشان تكون في مصلحة الاقتصاد وتدعم كل المجالات.
وفي الوقت اللى الحكومة بتشتغل على تحسين الضرائب العقارية.. المتوقع إن قبل نهاية السنة هنشوف حزمة تيسيرات جديدة تساعد في تخفيف العبء عن المستثمرين وكمان المواطن العادي.. والأهم من كده إن ده كله بيهدف لخلق مناخ استثماري جذاب يحفز الشركات العالمية تدخل مصر وتستثمر في مشاريع جديدة سواء في الصناعة أو الطاقة أو حتى السياحة.
فيا ترى هل الاقتصاد المصري هيشهد التحول اللي كلنا بنتمناه.. الحكومة واضحة في استراتيجيتها وإنها مش بتهزر لما بيجي موضوع دعم الصناعات وتحفيز الاستثمارات.. ومع الشراكة القوية بين وزارة المالية والاستثمار.. مستقبل مصر الاقتصادي بيبان واعد أكتر من أي وقت فات.
الخلاصة.. مصر بتتجه لعصر جديد من التقدم الاقتصادي .. والفرص قدامنا كبيرة جدًا.. من تحسين الصناعات ودعم الاستثمارات لجذب الشركات الأجنبية.. كل خطوة بتقربنا أكتر لتحقيق طفرات اقتصادية ضخمة.
