باب دولاري جديد.. مصر ناوية على إيه في تصدير الذهب؟
في الفترة الأخيرة مصر عملت تغيرات كبيرة في ملف الصناعة بشكل كامل، واحد من الملفات اللي الدولة شغالة عليها حاليا هيا تطوير ودخول عالم تصدير صناعة الذهب.. ياتري مصر بتعمل اية في الملف ده.. ومصر مستهدفة توصل لكام من صادرات الذهب
مصر في الفترة الرئاسية الجديدة بتستهدف تطوير الصناعة بشكل كامل، وتشجيع الاستثمارات الأجنبية علي الدخول للسوق المصري، وفعلا الدولة المصرية في الفترة الأخيرة بقت هدف رئيسي لرؤوس الأموال الأجنبية واللي دخلت مصر بشكل كبير بفضل الحوافز والتسهيلات الكبيرة اللي قدمتها الدولة المصرية.
صناعة الذهب واحدة من الحاجات اللي كانت في الفترة اللي فاتت بعيدة تماما عن السوق المصري، لكن مع تطوير الصناعة ، مصر بدأت عصر جديد، وفي عدد كبير من كبريات الشركات العالمية بدأت تدخل السوق المصري، وتنتج أنواع واشكال جديدة من انواع المشغولات الذهبية واللي عليها اقبال وطلب عالمي واغلب شغلها بيكون مخصص للتصدير للخارج.
طيب ازاي الحكومة المصرية هتحفز صناعة وتصدير المشغولات الذهبية والاحجار الكريمة؟
في الفترة اللي فاتت الحكومة أعلنت عن وضع استراتيجية وطنية لزيادة صادرات مصر من الذهب، وفعلا صادرات مصر من الذهب والحلي والأحجار الكريمة ارتفعت بنسبة 84% في أول 10 أشهر من 2024، وفي 5 دول رئيسية هيا اللي بتستحوذ علي نسبة 99.8% من إجمالي صادرات مصر من الذهب والحلي والأحجار الكريمة أولهم الامارات العربية المتحدة واللي بتاخذ نسبة 62.7% من إجمالي صادرات مصر من الذهب والحلي والأحجار الكريمة بقيمة 1.654 مليار دولار.
الخطة اللي حطتها الحكومة بتستهدف تحقيق نمو سنوي في صادرات الذهب والحلي بقيمة متقلش عن 15% في صادرات المشغولات سنويا، والنمو اللي حصل في صادرات مصر من الذهب والحلي والمجوهرات علي مدار الـ3 سنين اللي فاتوا شجعوا مصر علي صياغة استراتيجية لوضع مصر علي خريطة الدول المصدرة للذهب والمجوهرات.
الاستراتيجية الوطنية لزيادة صادرات مصر من الذهب والحلي بتستهدف أن مصر تكون واحدة من أكبر مصدري الذهب عالميا، خصوصا أن مصر في الفترة اللي فاتت قدرت تحقق مراكز متقدمة في صادرات الذهب، وتقدمت 50 مركزا في التصنيف العالمي، وحاليا مصر في الرتيب 54 عالميا في 2023.
الخطة الوطنية لزيادة صادرات مصر من الذهب بتستهدف كمان أن مصر تتحول لواحدة من أهم 20 مصدر للمشغولات الذهبية في 2026 .
