6350 جنيه للطالب.. أسعار اشتراكات BRT تصدم أولياء الأمور
لو ابنك أو بنتك هيستخدموا الأتوبيس الترددي BRT في الدراسة، يبقى لازم تعرف أسعار الاشتراكات الجديدة.
الشركة المصرية للأتوبيس الترددي بدأت إتاحة اشتراكات الطلاب لعام 2026، والاشتراك بيتحدد حسب عدد المحطات ومدة الاشتراك.
والأسعار بتبدأ من 350 جنيه لمدة 3 شهور لمسار 4 محطات، وتوصل لـ 2150 جنيه لمسار 30 محطة.
أما اشتراك الـ6 شهور، فبيبدأ من 680 جنيه، ويوصل لـ 4250 جنيه لأطول مسار.
لكن الرقم الأكبر بيظهر في اشتراك الـ9 شهور، اللي بيبدأ من 1010 جنيه لمسار 4 محطات، ويصل إلى 6350 جنيهًا لمسار 30 محطة.
يعني الطالب اللي محتاج أطول مسار وعايز اشتراك يغطي السنة الدراسية تقريبًا، هيدفع أكتر من 6 آلاف جنيه.
والاشتراكات متاحة لمدة 3 أو 6 أو 9 شهور، والطلاب يقدروا يبدأوا إجراءات استخراج الاشتراك من خلال استمارة يتم تحميلها وطباعتها، واستكمال بياناتها وختمها من الجهة التعليمية.
والسداد متاح نقديًا من شبابيك الحجز، أو من خلال إنستاباي، وكمان عن طريق الإيداع في الحساب البنكي المخصص للشركة.
أما الاستمارات، فيتم تسليمها في محطة إسكندرية الزراعي أو محطة أكاديمية الشرطة، وبعدها يستلم الطالب كارت الاشتراك من نفس المحطة.
