تطور هام في ملف الغاز المصري.. خطوة ممكن تقلب الموازين
يا ترى إيه اللي هيحصل في سوق الغاز في مصر بعد ما وكالة "فيتش" رفعت توقعاتها للإنتاج؟ وهل ده معناه إن مصر راجعة بقوة لسوق الغاز الطبيعي؟ والأهم.. هل ده هيأثر على الأسعار المحلية والتصدير؟
وكالة "فيتش سوليوشنز" رفعت توقعاتها لإنتاج الغاز الطبيعي في مصر خلال الربع الأول من 2025.. وده بعد استئناف عمليات الحفر في حقل "ظُهر" العملاق اللي بتديره شركة "إيني" الإيطالية.. وكمان التقدم في مشروع "ريفين" اللي شغال عليه شركة BP البريطانية.
طب الرقم اللي بنتكلم عليه الوكالة قد إيه؟
التوقعات بتقول إن الإنتاج هيزيد بنسبة 2.5% في 2025 ومعاها كمان زيادة إضافية 1% في 2026. وده بسبب إعادة تشغيل أعمال الحفر في حقل ظهر اللي هيضيف حوالي 220 مليون قدم مكعب يوميا.
دلوقتي لازم نسأل سؤال مهم.. هل ده كفاية؟
بص.. الإنتاج الحالي لحقل ظُهر لوحده حوالي 2 مليار قدم مكعب يوميًا.. وده بيمثل 35% من إجمالي إنتاج مصر من الغاز الطبيعي.. لكن المشكلة الأساسية إن مصر خلال آخر 3 سنين كانت بتعاني من انهيار في إنتاج الغاز.. حتى إنه في نوفمبر اللي فات الإنتاج وصل لأدنى مستوى ليه من 2016.
طب إيه أهمية خبر زياة انتاج الغاز ده بقى؟
أولًا.. زيادة إنتاج الغاز هتساعد مصر على تقليل الضغط على السوق المحلي.. خصوصًا بعد ما استهلاك الغاز المصري نزل 27% في آخر 3 سنين، لكن في 2024 الاستهلاك ثبت تقريبًا وما بقاش فيه انخفاض كبير.
ثانيا.. مصر بقالها فترة بتستورد الغاز بكميات كبيرة وبتعتمد على محطات عائمة للغاز الطبيعي المسال عشان تسد العجز وده كان مكلف جدًا. . فلو الإنتاج زاد ممكن نقلل فاتورة الاستيراد ونعتمد على الإنتاج المحلي بشكل أكبر.
ثالثًا.. زيادة الإنتاج ممكن تفتح الباب قدام عودة صادرات الغاز الطبيعي المسال اللي توقفت تمامًا من مارس 2024.. تخيل إن مصر كانت بتصدر 854 مليون متر مكعب بس السنة اللي فاتت.. وده رقم ضعيف جدًا مقارنة بالسنين اللي قبلها.
لكن رغم الأخبار الإيجابية دي، "فيتش" نفسها حذرت إن التحدي الأكبر هو استمرار انخفاض الإنتاج على المدى الطويل بسبب عدم وجود اكتشافات جديدة ضخمة أو مشاريع جاهزة للاستثمار. بمعنى إننا لو ما تحركناش بسرعة ممكن نرجع تاني لنفس الأزمة بعد كام سنة.
والسؤال اللي لازم نفكر فيه دلوقتي.. هل الحكومة هتقدر تحافظ على استدامة إنتاج الغاز وتحقيق التوازن بين الاستهلاك والتصدير.. وهل المستثمرين هيلاقوا الحوافز الكافية لضخ استثمارات جديدة في قطاع الغاز.. الاجابة على الأسئلة دي هتحدد بشكل كبير الدنيا هتمشي ازاى فى ملف انتاج الغاز الطبيعي وفى قدرة مصر على سد اى احتياج فى المستقبل.
