ازاي مصر بتتحول إلى مركز إقليمي للنقل واللوجستيات
ايه حكاية الممرات اللوجستية الاستراتيجية اللي بتعملها الدولة اليومين دول والممرات دي بتختلف ازاي عن الطرق العادية وايه علاقتها بالتجارة والمليارات والاستثمارات وقوة الدولة.
في الأول لازم نعرف يعني ايه ممرات لوجستية.. وبنقول لحضرتك إن دي عبارة عن منظومة نقل متكاملة عبارة عن طرق ومحاور مرتبطة بمواني وسكة حديد وخدمات تانية ليها وكل دا بيخدم منظومة أو مناطق انتاج وتصنيع وتصدير يعني المنتج بيوصل من المصنع أو المزرعة لمينا التصدير في اقل وقت ممكن وفي نفس الوقت شبكات الطرق دي بتربط المواني المصرية مع بعضها ودا كله لتسهيل عملية النقل والتصدير وبعيدة قدر الإمكان عن شبكات الطرق العادية اللي معمولة للمواطنين.
والممرات الللوجستية دي بتكون من عوامل قوة الدولة في بنيتها التحتية والتجارية ومن أهم المميزات اللي بتجذب المستثمرين للاستثمار في السوق المصري لأنه ييضمن اسرع ترويج وتصدير لمنتجه في امان وسرعة ومن خلال كل المواني في رقم قياسي ودا هيخلي مصر رقم مهم ومركز إقليمي في المنطقة في النقل واللوجستيات لان الشبكة دي مرتبطة بالموانئ اللي في البلاد اللي حولينا.
طيب مصر عندها كام ممر لوجستي ؟
الدولة عملت شبكة كاملة من الممرات والمناطق اللوجستية في مصر قادرة تستوعب أي حركة تجارة وتصنيع وتصدير واهمها لغاية دولتي7 ممرات لوجستية متكاملة جاري تنفيذها ضمن خطة تطوير منظومة النقل على مستوى الجمهورية وهي ممر السخنه- الإسكندرية اللوجستي ويمتد من ميناء السخنة على البحر الاحمر الى ميناء الاسكندريه الكبير بالبحر المتوسط والتاني هو ممر العريش - طابا ويمتد من ميناء العريش على البحر المتوسط إلى ميناء طابا بخليج العقبة والممر التالت هو ممر القاهره - الاسكندريه اللوجستي واللي بيمتد من محطة سكك حديد مصر قطارات الصعيد ببشتيل لغاية ميناء الإسكندرية الكبير.
أما الممر اللوجستي الرابع فدا بيبدأ من المنطقة اللوجستية بطنطا في قلب الدلتا وربطها بميناء دمياط من خلال خط سكة حديد طنطا المنصوره دمياط وبعدها ممر جرجوب - السلوم اللوجستي ويبدأ من ميناء جرجوب على البحر المتوسط ويصل إلى ميناء السلوم البري وممر القاهره - اسوان - ابو سمبل اللوجستي ويشمل الخط التانى من القطار الكهربائي السريع وطريق الصعيد الصحراوي الغربي.
اخر ممر معانا هو ممر سفاجا - قنا - أبو طرطور اللوجستي ودا بيبدأ من ميناء سفاجا على البحر الأحمر والمنطقة اللوجستية بسفاجا مرورا بالخط التالت من القطار الكهربائي السريع وخط سكة حديد الديزل سفاجا قنا أبو طرطور.
طيب ايه فايدة الممرات التجارية اللوجستية ؟
زي ما قلنا إن الممرات دي بتدي قوة اقتصادية للدولة المصرية وبخلاف دا فهي بتعتبر شبكة متكاملة بتربط مناطق الإنتاج والتصنيع والتعدين بالموانئ البحرية وكمان فايدتها ربط المواني البحرية المصرية في البحرين الأبيض والأحمر وبجانب خدمة المجتمعات العمرانية والصناعية والزراعية الجديدة بشبكة طرق ومواني وكل دا بيدي مرونة وحركة وميزة لمصر أنها تستفيد من موقعها الجغرافي القريب من الأسواق وينشط عندها كمان صناعة التعهيد والتصنيع لأطراف تانية وجذب استثمارات بمليارات الدولارات في المناطق القريبة من الممرات اللوجستية دي والموانئ زي ما بيحصل كده في المنطقة الاقتصادية بقناة السويس.
