أسواق العالم تحبس الأنفاس.. هل يفاجئنا الفيدرالي بقرار غير متوقع؟
ليه كل الأسواق مستنية قرار الفيدرالي الأمريكي النهاردة؟ هل الفايدة هتفضل زي ما هي ولا ممكن نشوف مفاجأة تهز الأسواق؟ ولو رفع الفايدة، ده معناه إيه على الاقتصاد العالمي وعلى جيب المواطن العادي؟
النهاردة يوم مش عادي خالص في عالم الاقتصاد العالمي.. كل العيون على الفيدرالي الأمريكي اللي هيعلن قراره بخصوص سعر الفايدة.. الأسواق المالية في ترقب المستثمرين في قلق وحتى المواطن العادي بيحس بتأثير القرار ده على حياته اليومية عشان قرار الفايدة الأمريكي مش مجرد رقم بيظهر في الأخبار ده قرار بيحرك أسعار العملات، الدهب، البترول، وحتى أسعار السلع اللي بنشتريها كل يوم فاكرين لما الدولار كان بيقفز أو ينزل فجأة؟ غالبًا كان بسبب قرار الفيدرالي.
الفيدرالي بقاله فترة بيحاول يسيطر على التضخم من غير ما يخنق الاقتصاد، وده اللي مخلي الكل مستني يشوف هياخد أي طريق.
طب ايه التوقعات بتقول إيه؟
التوقعات الأولية بتقول إن الفيدرالي ممكن يثبت سعر الفايدة عند مستوياته الحالية، خاصة إن التضخم في أمريكا بدأ يهدأ شوية، ونمو الاقتصاد الأمريكي بيواجه بعض التحديات.. لكن برضه فيه احتمال صغير إن الفيدرالي يرفع الفايدة بنسبة 0.25%، عشان يواجه أي ضغوط تضخمية مستقبلية. الأسواق المالية عاملة حساباتها على الأساس ده، لكن لو حصل أي قرار غير متوقع، يبقى احتمال حدوث صدمة كبيرة في الأسواق قائم.
وهل ممكن الفيدرالي يفاجئ الأسواق بقرار غير متوقع؟
الأسواق المالية بتحب الاستقرار وأي قرار غير متوقع من الفيدرالي ممكن يسبب حالة من الذعر.. زي ما حصل في 2023 لما الفيدرالي رفع الفايدة بشكل مفاجئ، وكانت النتيجة انهيار في أسواق الأسهم وارتفاع كبير في سعر الدولار.. النهاردة الأسواق عندها توقعات معينة، فلو الفيدرالي قرر يرفع الفايدة أكتر من المتوقع أو حتى يخفضها يبقى احتمال حدوث تقلبات كبيرة في الأسواق العالمية.
وليه الأسواق بترقب قرار الفيدرالي؟
قرار الفيدرالي مش بس بيهم الاقتصاد الأمريكي.. ده بيهم كل اقتصاديات العالم بما فيها الاقتصاد المصري.. لما الفيدرالي بيقرر يرفع الفايدة الدولار بيقوى والعملات التانية بتضعف بما فيها الجنيه المصري..و ده بيأثر على أسعار الاستيراد، التضخم، وحتى أسعار الفايدة المحلية في مصر. فلو الفيدرالي رفع الفايدة النهاردة يبقى احتمال زيادة الضغط على الجنيه المصري وارد.. وده ممكن يخلي البنك المركزي المصري يفكر في رفع الفايدة برضه عشان يجذب المستثمرين الأجانب.
اجمالا قرار الفيدرالي النهاردة مش مجرد خبر عادي ده حدث اقتصادي كبير بيأثر على حياتنا كلها.. الأسواق في ترقب، والمستثمرين في حالة تأهب.. فلو كنت بتتابع أسعار الدولار، الدهب، أو حتى بتفكر تستثمر في البورصة، يبقى قرار الفيدرالي ده هيفرق معاك.
