ليه الدهب سعره مرتفع رغم استقرار الدولار.. هنقولك إيه اللي بيحصل ؟
أسعار الذهب حاليا في مصر بترتفع يوم بعد التاني .. ياتري اية اسباب ارتفاع اسعار الذهب في مصر.. وسعر الجرام هيوصل في مصر في الفترة اللي جاية لكام؟
اسعار الذهب حاليا مرتفعة جدا في مصر خصوصا أن الارتفاع ده جاي بعد الهدوء النسبي اللي بدأ يحصل في التوترات السياسية اللي موجودة في اغلب دول العالم خصوصا في منطقة الشرق الأوسط، والتوترات دي كانت سبب اساسي في ارتفاع اسعار الطاقة العالمية واللي كانت سبب في رفع اسعار الذهب بسبب اعتماد صناعة الذهب علي الطاقة.
الذهب عيار 21 واللي هو معروف بانه الاكثر انتشارا في مصر وخصوصا في القري والمحافظات وصل لأكثر من 3800 جنيه وكل يوم الأسعار بترفع عن اليوم اللي قبه، وحاليا الاسعار قربت علي 4000 جنية للجرام الواحد بدون اسعار المصنعية، ومحدش عارف أية اسباب الارتفاع خصوصا أن اسعار صرف العملات الأجنبية مستقرة في مصر من فترات طويلة ومفيش اي جديد يستدعي الزيادات الكبيرة في اسعار الذهب.
طيب اية هيا اسباب ارتفاع اسعار الذهب في مصر حاليا؟.
هاني ميلاد رئيس شعبة الذهب بالإتحاد العام للغرف التجارية، قال أن أسعار الذهب رجعت ترتفع تاني بالتزامن مع تولي الرئيس الأمريكي الجديد دونالد ترامب لقيادة البيت الأبيض من جديد، وأن ارتفعا أسعار الذهب في مصر ملهوش علاقة بالسوق المحلي ولكن مرتبط بالسعر العالمي.
رئيس شعبة الذهب بالاتحاد العام للغرف التجارية كمل كلامه وقال أن التخفيضات الكبيرة في أسعار الذهب بتكون على المصنعيات مش علي سعر الذهب الاساسي.
هاني ميلاد زف بشري سعيدة للشباب اللي ناويين يتجزوا أو يخطبوا علي عيد الفطر المبارة واللي هيكون بعد شهرين من النهاردة، وقال أن سعر الذهب في رمضان والعيد مش هيشهد زيادة مع الإقبال الكبير اللي بيحصل علي محالات الصاغة في الأوقات دي من العام، خصوصا أن فترات العيد معروفة في مصر بارتفاع حالات الزواج والخطوبة، واغلب الأسر المصرية بتكون محددة الأعياد كمناسبة سعيدة للاحتفال بالزواج والخطوبة خصوصا أنها بتكون مناسبات بتتجمع فيها كل الأسر المصرية، وكل المصريين العاملين في الخارج بيكونوا حريصين علي النزول لبلادهم للاحتفال مع اسرهم بشهر رمضان وأجازات العيد.
هاني ميلاد قال أن ارتفاع اسعار الذهب في مصر سببه الارتفاع اللي حصل في السعر العالمي نتجية الاضطرابات والأحداث الجيوساسية اللي حصلت علي مدار 15 شهر في منطقة الشرق الأوسط واللي اثرت علي اسعار الطاقة واللي هيا المتحكم الرئيسي في اسعار الذهب عالميا، ده غير التصريحات المثيرة للرئيس الأمريكي الجديد دونالد ترامب واللي أكد فيها رغبته في ضم كندا لتصبح ولاية أمريكية واللي نبأت بحدوث توترات جيوسياسية جديدة في دول العالم، وطبعا هيكون لها انعكاسات كبيرة علي اسعار الطاقة من جديد وبالتالي متوقع أن اسعار الذهب تفضل مرتفعه لحين هدود التوترات الموجودة بين اغلب دول العالم.
