مستقبل العالم وبديل البنزين والسولار.. شوف مصر هتنتج الهيدروجين الأرخص في العالم أزاي
مصر حاليا بتعمل معجزة وهتنتج ارخص هيدروجين أخضر في العالم.. يا ترى اية حكاية الهيدروجين الأخضر ده.. واية الفائدة اللي هترجع علي مصر من انتاج الهيدروجين الأخضر.
الهيدروجين الأخضر لما ظهر العالم وصفوه أنه وقود المستقبل، وفي خلال السنين اللي جاية مش هيكون عندنا حاجة اسمها بنزين أو سولار، وهيكون الوقود النظيف اللي متعارف عليه في كل دول العالم خصوصا في ظل الخطوات اللي بدأ عدد كبير من دول العالم ياخذها علشان نحافظ علي طبقة الأوزون ونحافظ علي الغلاف الجوي، خصوصا أن المناخ حاليا بقي خطر بيهدد اغلب دول العالم.
زي ما احنا عارفين أن مصر وقت استضافتها لمؤتمر الاطراف لتغير المناخ كوب 27، مصر اعلنت عن التزامها باتخاذ خطوات للحفاظ علي المناخ، وفعلا مصر غيرت نسبة كبيرة من نشطاها الاقتصادي سواء في انتاج وتوليد الكهرباء من مصادر الطاقة التقليدية واللي شغالة بالوقود التقليدي سواء كان مازوت أو غاز طبيعي، واتجهنا حاليا لتوليد الكهرباء من مصادر الطاقة الجديدة والمتجددة زي الهواء والشمس، وكمان غيرنا نسبة كبيرة من السيارات واتوبيسات النقل العام للعمل بالطاقة النظيفة وبدأنا في مصر ننتج العربيات الكهربائية، د غير كمان تشغيل نسبة كبيرة من المصانع ورحلات الطيران بالوقود الحيوي وهو وقود أمن علي الغلاف الجوي.
طيب اية حكاية انتاج مصر الهيدروجين الأخضر الأرخص في العالم وازاي مصر هتستفاد من الموضوع ده؟
الهيدروجين الأخضر ده بيتم إنتاجه من خلال عملية التحليل الكهربائي للماء باستخدام الطاقة المتجددة، زي طاقة الشمس والرياح، وده هيخليه وقود بديل وصديق للبيئة، وبيتم انتاج الهيدروجين الأخضر من خلال فصل الماء لهيدروجين وأكسجين من خلال التحليل الكهربائي والعملية دي بتتطلب كهرباء نظيفة علشان تكون فعالة من حيث الكفاءة البيئية، وفي حالة لو كانت الطاقة المستخدمة في عملية التحليل جاية من مصادر متجددة، فالهيدروجين الناتج هيكون خالي من الانبعاثات الكربونية وده هيخليه هدف مثالي لمستقبل الطاقة المستدامة للعالم كله.
ومصر أعلنت انها هتنتج الهيدروجين الأرخص في العالم باستغلال المياة المالحة ومحطات توليد الكهرباء اللي الدولة بتعملها دولوقتي بالقرب من قناة السويس، وبالتالي مصر هتقدر تنتج وتصدر الهيدروجين الأخضر واللي هيستخدم كبديل لوقود السيارات وهيكون الأقل تكلفة في العالم كله وهيكون في المستقبل باب دولاري مهم لمصر من الطاقة النظيفة.
مصر في الفترة اللي فاتت وقعت أكثر من 14 مذكرة تفاهم مع جهات وشركات كتيرة في العالم لتركيب وبناء وتشغيل منشأت في المنطقة الاقتصادية لقناة السويس لإنتاج الهيدروجين الأخضر، ومصر حاليا عندها خطة لإنتاج 100 ألف طن من أمونيا خضراء و20 ألف طن إضافية من الهيدروجين الأخضر الصديق للبيئة بداية من العام الحالي، واستراتيجية مصر للتحول لمركز اقليمي لتبادل الطاقة بتستهدف إنتاج أكثر من مليار طن من الأمونيا الخضراء وربع مليون طن من الهيدروجين الأخضر وده تقريبا ربع الإنتاج العالمي.
