حلم الـ100 مليار دولار يقترب.. مصر صدرت بكام مليار في آخر سنة؟
زيادة الصادرات هدف استيرايجي ولازم الحكومة تنفذه في الوقت الحالي علشان متتكرش عندها أزمة نقص عملات أجنبية مرة تانية.. ياتري الحكومة بتعمل اية لزيادة الصادرات.. والحكومة بتستهدف تحقق كام من الصادرات.
واضح جدا أن الحكومة اتعلمت الدرس كويس قوي اللي حصل في مصر مع نهاية 2023 الشهور الأولي من 2024 واللي كانت مصر بتعاني فيهم من نقص شديد في الموارد الدولارية، وعلشان كده الدولة خطت خطة لمنع تكرار الأزمة مرة تاني.
الخطة اللي حطتها الحكومة جزء كبير منها قايم علي زيادة الصادرات المصرية من كل الأنواع، وكانت بداية خطة الحكومة لزيادة الصادرات من تعديل التشريعات الجمركية والافراج الجمركي علي البضائع في الموانئ والمطارات خصوصا تشريعات التصدير كان فيها مشاكل كتيرة في الفترة اللي فاتت وكانت بتمنع اي مستثمر عايز يدخل مصر ويستثمر فلوسه في مجال هيكون إنتاجه للتصدير للخارج.
التسهيلات اللي قدمتها الحكومة لتسهيل نفاذ الصادرات تضمنت كمان تخفيض التعريفية الجمركية علي البضائع خصوصا أنها كانت مشكلة لاي مستثمر عايز يبدأ مشروع جديد، بسبب أنه كان بيحس أنه حصيلة كل انتاجه هتروح للدولة كضرايب ومستحقات إفراج جمركي بالموانئ ده غير المشاكل اللي كان بيقابلها كتير علي ما يعرف يصدر اصلا.
طيب اللي حققته مصر في الفترة اللي فات بعد ما قدمت تسهيلات كتيرة في مجالات التصدير؟.
شعبة المصدرين بالاتحاد العام للغرف التجارية قالت أن الصادرات السلعية المصرية سجلت ولأول مرة 40 مليار دولار السنة اللي فات بنسبة نمو وصلت لـ 12.4% مقارنة بـ 35.6 مليار دولار صادرات في 2023.
شعبة المصدرين بالاتحاد العام للغرف التجارية قال ان مصر عندها خطة للوصول بالصادرات السلعية لأكثر من 100 مليار دولار في 2030، وقالت أنه مصر حاليا بتعد بيئة خصبة لجذب الاستثمارات العالمية بعد الحوافز والتسهيلات الكبيرة اللي قدمتها الدولة للمستثمرين وده اللي خلي مصر بيئة آمنة ومستقرة للاستثمارات الأجنبية في الوقت الحالي.
الشعبة توقعت أن قطاع التصدير يحقق طفرة كبيرة في 2025 مع استقرار سعر الصرف وزيادة الطلب الخارجي على المنتجات المصرية، خصوصا في الأسواق الجديدة اللي بتسعى الدولة لفتحها، والتركيز على الأسواق اللي بتستورد بدون اي قيود على العملات الأجنبية وده هيزود حصيلة مصر الدولارية من التصدير.
