رقم ضخم جدًا.. شوف إجمالي الديون الخارجية اللي مصر هتسددها في 2025؟
ملف الديون الخارجية من الملفات الحساسة على مكتب الحكومة دلوقتي، خصوصًا أن مصر عايزة تفضل ملتزمة بمواعيد سداد ديونها، فالسؤال هو: مصر هتسدد ديون قد إيه السنة دي؟ ومنين هتجيب الدولارات دي علشان تسدد ديونها؟
مصر من الدول اللي عليها التزامات مالية كبيرة مع جهات دولية، والديون دي تم أخذها على مدار سنين طويلة وحكومات متعاقبة، مش بس في الحكومة الحالية. لكن مؤخرًا ومع التعاون المستمر بين مصر والجهات المانحة، وعلى رأسهم صندوق النقد الدولي، أصبحت مصر من أكثر الدول الملتزمة في سداد ديونها في مواعيدها المحددة، والصندوق أشاد بذلك أكتر من مرة.
طيب ديون مصر الخارجية وصلت كام حاليًا؟ ومصر هتسدد منهم كام السنة دي؟
البنك الدولي قال في تقريره إن إجمالي الديون وفوائدها اللي مصر هتسددها السنة دي هيوصل لـ 43.2 مليار دولار من يناير لحد سبتمبر 2025. منهم 5.9 مليار دولار فوائد ديون، و37.3 مليار دولار أصل القروض.
وقال البنك الدولي كمان إن الحكومة المصرية هتكون مطالبة بسداد 10.4 مليار دولار من المبالغ دي، والبنك المركزي هيكون مطالب بسداد 21.2 مليار دولار، والبنوك التجارية هتكون مطالبة بسداد 8.1 مليار دولار، والقطاعات الأخرى في الدولة هتكون مطالبة بسداد 3.5 مليار دولار في أول 9 شهور من السنة الحالية.
البنك الدولي أكد أن الالتزامات الدولية على مصر بتتوزع بين قروض بقيمة 17.1 مليار دولار، و20.5 مليار دولار ودائع واتفاقيات مبادلة عملة هيكون لازم على البنك المركزي سدادها خلال 2025. ده غير 272 مليون دولار ودائع وعملات مستحقة على البنوك لازم يتم سدادها. وكمان في 3.1 مليار دولار هنسددهم كأوراق دين، وأخيرًا 2.1 مليار دولار كديون تسهيلات تجارة.
طيب إجمالي الديون اللي مصر سددتها وصلت كام حاليًا؟
البنك المركزي قال إن مصر سددت في الربع الأخير من 2024 ديون وصلت لـ 17.8 مليار دولار، منهم 6 مليار دولار كانت التزامات على الحكومة، و2 مليار دولار كانت التزامات على البنك المركزي، و5.2 مليار دولار كانت التزامات على البنوك، و4.5 مليار دولار كانت التزامات على القطاعات التانية في الدولة، والبنك المركزي كمان أعلن في تقريره إن مصر سددت السنة اللي فاتت 38 مليار دولار من القروض الخارجية.
