الجنيه طالع.. والدولار بيتراجع؟.. حكاية المليارات اللي داخلة مصر
إيه اللي يخلي الجنيه المصري يبدأ يصعد قدام الدولار؟ وإزاي تدفق مليارات للدين المصري ممكن تغيّر شكل السوق؟ وهل ده معناه إن سعر الدولار هيثبت ولا فيه مفاجآت جاية؟
الفترة اللي فاتت بدأت أخبار إيجابية تسيطر على المشهد الاقتصادي وأهمها التوقعات بارتفاع قيمة الجنيه المصري قدام الدولار.. علشان البلد شهدت تدفقات استثمارية قوية في أدوات الدين الحكومية.
بنك عالمي زي "جولدمان ساكس" توقع إن الجنيه هيواصل الارتفاع قدام الدولار خلال الشهور الجاية.. والسبب الرئيسي ان الاستثمارات اللي خرجت من مصر في 2024 بترجع تاني وبقوة من بداية 2025.. و الجنيه ارتفع حوالي 1.5%... وده مؤشر واضح إن السوق بيتحرك في اتجاه إيجابي.
حد ممكن يسأل ويقول .. وايه حكاية التدفقات الدولارية الكبيرة؟
الموضوع باختصار إن المستثمرين الأجانب بدأوا يدخلوا السوق المصري تاني وبيركزوا على الاستثمار في أدوات الدين زي أذون الخزانة والسندات الحكومية..و التقديرات بتقول إن الاستثمارات الأجنبية في الدين المحلي وصلت حاليًا لحوالي 10 مليار دولار وده رقم صغير مقارنة باللي ممكن يدخل السوق في المستقبل.. ومعناه إن السوق فيه مجال لاستيعاب مليارات جديدة خصوصًا إن استحقاقات الدين الكبيرة اللي جاية في مارس 2025 مش هتأثر بنفس القوة اللي كانت متوقعة قبل كده.
طيب ليه الجنيه بيتحسن؟
فيه اسباب كبير للتحسن ده .. أهمها تراجع موجة البيع.. خلال الربع الأخير من 2024 حصل بيع كبير لأدوات الدين بس حاليًا أغلب الديون بقت في إيد المستثمرين المحليين فمش هيبقى فيه ضغوط كبيرة على الجنيه.. كمان المجموعة الاقتصادية الحالية بتشتغل بسياسات متناسقة وده بيخلق مناخ أكتر استقرار للاستثمار.. والمستثمرين بقى عندهم ثقة أكتر في السوق المصري وده بيظهر من خلال عودة الأموال الساخنة للسوق.
وإيه تأثير ده على سعر الدولار؟"
دلوقتي التدفقات الكبيرة دي بتخلق ضغط إيجابي على الجنيه وبالتالي سعر الدولار قدامه بيبدأ يتراجع أو على الأقل يثبت عند مستويات أقل.. لكن لازم نكون واقعيين.. الدولار مش هيختفي من اللعبة لأن السوق العالمي متغير وأي تقلبات في الاقتصاد العالمي أو أزمات زي التضخم أو رفع الفايدة في أمريكا ممكن تأثر على التوازن ده.
"جولدمان ساكس" توقع إن البنك المركزي ممكن يخفض الفايدة خلال السنة الحالية بشكل تدريجي وده بيحصل مع تحسن وضع الجنيه وتقليل معدلات التضخم.. لكن التوقع ده محل نقاش لأن الاقتصاديين المصريين شايفين إن التخفيض هيبقى أقل بكتير من اللي البنك الأمريكي متوقعه.. التخفيض المتوقع في الفايدة ممكن يحفز الاستثمار في قطاعات الإنتاج الحقيقي بدل التركيز الكامل على أدوات الدين.
وده معناه إيه للمواطن العادي؟
ارتفاع الجنيه قدام الدولار ممكن يقلل الضغط شوية على أسعار السلع المستوردة ويخلق أمل في استقرار الأسعار اللي بترهق جيب المواطن.. بس برضه ده هيحتاج وقت علشان يظهر تأثيره بشكل كامل.. أما بخصوص خفض الفايدة فده معناه إن تكلفة القروض هتبقى أقل وده ممكن يشجع الشركات على التوسع وزيادة الإنتاج وده هيكون له تأثير إيجابي على سوق العمل.
