إيه حكاية مشاريع الإسكان الأخضر اللي الحكومة بتعملها.. هنقولك الدولة بتعمل إيه
من كام ساعة مصر أعلنت عن طرح 14 الف وحدة سكنية للاسكان الاخضر ضمن مبادرة سكن كل المصريين .. ياتري ليه الدولة اعلنت عن الوحدات دي واشمعني الوحدات الخضراء اللي الدولة خصصتها في الطرح ده.
مصر في القطاعات والهيئات والوزارات التابعة لها بتحاول تطبق البنود اللي اتفقت عليها وقت استضافتها لمؤتمر تغير المناخ كوب 26 واللي التزمت فيه مصر بالتحول للاعتماد علي الطاقة الخضراء والنظيفة في كل القطاعات والهيئات التابعة لها، وفعلا مصر بدأت تطبق البنود دي في قطاعات النقل والطاقة والبيئة، وتخفض ابنعاثات الكربون علشان تحافظ علي الغلاف الجوي ونحافظ علي التوازن البيئي واللي بقي بهدد كل دول العالم حاليا.
طيب اية حكاية الـ14 الف وحدة سكنية الخضراء اللي اعلنت عنهم الحكومة دول؟.
الحكومة ممثلة في وزارة الاسكان والمجتمعات العمرانية أعلنت شروعها في بناء 14 الف وحدة سكنية خضراء ودول هيكونوا معتمدين في بنائهم علي مواد بناء صديقة للبيئة وحلول معمارية مناسبة للمناخ لتقليل الانبعاثات الكربونية، وهيكون في توفير في استهلاك المياه والكهرباء نتيجة الاعتماد على مصادر الطاقة المتجددة، وتدوير المياه الرمادية لاستخدامها في ري المسطحات الخضراء.
وطبعا زي ما احنا عارفين أن المبادرة الرئاسية سكن لكل المصريين بتهدف في الاساس لتوفير وحدات سكنية للمواطنين بما يتناسب مع شرائج الدخل المختلفة، ومن خلالها الدولة بتوفر وحدات سكنية لكل شرائح المجتمع على 3 محاور أولهم الشقق السكنية الفاخرة ودي مخصصة لأصحاب الدخل الأعلى ودي بتكون بسعرها الحقيقى، وكمان الدولة بتوفر الوحدات السكنية المتوسطة دي لأصحاب الدخل التوسط واخيرا شريحة محدودى الدخل، والدولة بتوفر لهم وحدات الإسكان الاجتماعى واللي بتكون مدعومة من الدولة.
وعلشان نكون عارفين أن الدولة وهيا بتبني وحدات سكنية زي سكن لكل المصريين، فالنوع ده من الوحدات بيكون بيضم كل احتياجات المواطنين من مدارس وحضانات ووحدات صحية وأسواق تجارية وملاعب رياضية.
والدولة بتكون ملتزمة بتسليم الشقق لاصحابها في المواعيد المقررة ولازم تكون بجودة عالية وفقا للمعايير الموجودة في كراسات الشروط، وحاليا الدولة بتتوسع بشكل كبير في طرح أنواع مختلفة من سكن كل المصريين خصوصا بعد الإقبال الكبير واللي غير متوقع علي شراء كراسات الشروط، وده هيدي دفعة للدولة لبناء وحدات سكنية جديدة للمواطنين المستحقين.
