ممكن تخسر نص تحويشة العمر.. خلي بالك من اللي بيحصل في سوق الدهب
يا ترى إيه اللي بيحصل في سوق الدهب دلوقتي، وهل الوضع خطير ولا مجرد ظاهرة بتحصل في الصاغة، وإيه علاقة كل ده بالأسعار.
لعبة خطر جدًا، ومش نزيهه على الإطلاق، أو ممكن نقول سبوبة من العيار التقيل، بتحصل في سوق الدهب، وتحديدا بين التجار والشركات، ونتايجها كارثية على السوق وعلى المواطن.. يا ترى إيه هي؟
لو حضرتك مواطن مكافح، بتحاول تعمل جميعات وتزنق نفسك، وعشان تعمل فايض بسيط، تدخره للزمن، ففي الغالب طالما المبلغ بسيط هتحطه في الدهب، وخاصة العملات زي نص أو ربع جنيه دهب، وده حال كتير من المصريين، لأنه ميجبش عقار مثلًا، فالأولى إنك تجمده في جنيه ذهب عشان تحفظ قيمة الفلوس، ويوم ما تعوذ تبيع بتبيع.
خد بقى المفاجأة دي، أنت لو رحت تبيع الجنيه الدهب دلوقتي، هتتعمل عليك مصلحة بين قوسين (نصباية كبيرة) ، لأ وهتخسر في الغالب في جنيه الذهب اللي أنت إشتريته، وهتبقى الخسارة غير مُبررة.. طب ليه بقى؟!
بص يا سيدي، ببساطة كده سوق الدهب نام وصحي، فقرر يلغي تداول "جنيهات الدهب البلدي" بين قوسين اللي مش مُغلفة..طيب ليه؟! مالها؟!
رد التجار، أنها جنيهات بدون تغليف وغير مدموغة، وعيارها بيكون غير صحيح بنسبة 100%.. إزاي الكلام ده.. أومال بتتداولوها إزاي بقالكم سنين؟!
طبعًا مفيش إجابة.. طيب فيه قرار من الدولة بالإتجاه ده ؟!
طبعًا مفيش رد، هم المحلات ناموا صحيوا أخدوا القرار ده، مع شعبة الدهب كمان، إللي دورها روتيني في سوق الدهب.
طيب لو القرار مناسب للمواطنين، طب الشعبة المفروض تعلن القرار ده ومش صحيح، وده لأن الجنيهات البلدي اللي في السوق مدموغة، وموضوع التغليفة ده بدعه إبتدعتها الشركات، وعشان تسحب السبوبة من الورش، اللي هي بتشتغل في الجنيه البلدي.
وللعلم، أصلًا الشركات أغلبها كان ورش، أما العيار أو الوزن فالكل بما فيهم حضراتكم، عارف أن كل جنيه بيكون ناقص من 1.5 لـ3 ملي جرام، وبنحاسب عليهم.. فالمفروض الشعبة، تعلن القرار، وتنسق مع الحكومة في الأول، لأن ده قرار أمن قومي، وتدي فرصة لكل مواطن يروح يغير الجنيه اللي عنده بالمغلف.
خد بقى التقيلة والمفاجأة، المحلات بقى تقولك مش هبيع الجنيه البلدي، وتوقف تداوله، بقرار بين التجار وبعضهم، والمصانع أو الشركات، مش كده وبس، ده لما تروح تبيع بيخصم من سعر الجنيه، 15ملي من قيمة الجنيه البلدي، ده غير المصنعية وفرق سعر البيع من الشراء.
فيه بقى تجار بيخصموا 20 ملي، عند اللي بيستغل الفرصة ( والصراحة أبو 20 قليل..تخيل)؟!
المهم، إن محدش بيردك من التجار غير لما يشتري منك، طيب لو ده جنيه مش مضبوط بتشتريه ليه، ولو مضبوط، بتخصم منه 15 ملي، وأكتر ليه؟!
يعني أنت لو شاري جنيه دهب، تحفظ فيه قيمة فلوسك، فأنت خسرت 15 ملي، غير المصنعية وغير فرق سعر البيع من الشراء.
وبخصوص الجنيه البلدي، ففي إستهتار من التجار بمدخرات الناس، وعبث بالقوانين وقرارات الدولة، لأن مفيش لا قانون ولا قرار بده، مفيش إعلان رسمي، هو إتجاه وقرار داخلي لشعبة الدهب، اللي قرارها غير مُلزم للسوق سواء مواطن وتاجر وصانع .
وبالتالي، لازم الحكومة تتدخل وبشكل عاجل، ووزير التموين يكون ليه وقفة مع السوق ده.. والأفضل ومصاريف بمصاريف، يبقى الدولة تفعل باركود الدهب، وتدي فرصة للناس تعمل باركود أو تغير كل مدخراتها من الدهب، بالدهب اللي عليه باركود، ونبقى عارفين الدهب اللي في البيوت قد إيه وكمان مُسجل عند الدولة.
