كواليس هتعرفها لأول مرة عن سبب زيادة حصة مصر في صندوق النقد الدولي
من كام يوم الجريدة الرسمية نشرت قرار الموافقة على زيادة حصة مصر في صندوق النقد الدولي بنحو 50%، ياتري اية حكاية القرار ده.. وهل القرار ده هيكون باب جديد لمصر علشان تاخذ قروض جديد.
مصر من فترات طويلة وهيا بدأت برنامج الإصلاح الاقتصادي بالتعاون والتنسيق مع صندوق النقد الدولي، والبرنامج ده بيهدف للنهوض بالاقتصاد المصري، علشان يكون اقتصاد قوي ومرن قادر علي التعامل مع الصدمات، خصوصا ان مصر محاطة بكم كبير من التغيرات الجيوسياسية اللي بتغير كل يوم في الخريطة الاقتصادية لمصر ولها تاثير مباشر علي الاقتصاد القومي المصري، وبالتالي برنامج الاصلاح الاقتصادي اللي مصر بتطبيقه بالتعاون مع صندوق النقد الدولي الهدف منه أنه يكون قادر علي التعامل مع كل الصدمات سواء كانت صدامات داخلية او خارجية.
طيب اية هو القرار اللي خدته مصر والخاص بالموافقة على زيادة حصتها في صندوق النقد الدولي بنحو 50% ؟
قبل ما تسمع كلام وكتير وطبعا القنوات اياها هتقولك أن القرار ده هيكون بوابة لمصر علشان تاخذ قروض جديدة، وتزود الديون اللي موجودة علي مصر للصندوق، والصندوق هدفه ان مصر تفضل غرقانة في الديون علشان متقملهاش قومه.. وطبعا الكلام ده كله مش حقيقي، خصوصا أن مصر بتتبني برنامج اقتصادي بيهدف الي تشجيع الاستثمار والصناعة في كل المجالات، وكمان بيهدف الي زيادة الصادرات وزيادة حصيلة الدولة المصرية من الدولار وتقليل الاستيراد، والعمل علي معادلة الميزان التجاري لمصر.
قرار مصر بالموافقة على زيادة حصتها في صندوق النقد الدولي بنحو 50% جه استجابة لقرارات المراجعة العامة الـ16 واللي أقرت زيادات حصص الدول الأعضاء، وحصة مصر في الصندوق بتوصل لـ2.037 مليار وحدة حقوق سحب خاصة.
والقرار ده هيكون له نتيجتين الأولي منهم أنها هتخفض الرسوم الإضافية اللي بتدفعها مصر نتيجة ارتفاع التمويلات كنسبة في حصتها في الصندوق عن الحدود الطبيعية، خصوصا ان مصر في 2024، دفعت 184.5 مليون دولار رسوم إضافية على مستوى المديونية اللي موجودة علي مصر للصندوق .
تاني نتيجة هتستفاد منها مصر من زيادة حصتها في صندوق النقد لـ50% هيا أنها هتكون قادرة على اقتراض جديد من صندوق النقد الدولي في حالة حدوث أي صدمات.
صندوق النقد الدولي أكد أن زيادة حصص الدول في الصندوق؟.. هيزود موارد الصندوق علشان توصل لـ 960 مليار دولار، والسنة اللي فاتت، صندوق النقد الدولي اقر اتفاقية لتقليل الرسوم الإضافية للدول الأعضاء، وبالفعل الصندوق خفض الرسوم الإضافية على مصر بقيمة 800 مليون دولار حتى 2030، وزيادة حصة مصر في الصندوق لـ50% هتقدم خفض إضافي لمصر.
طيب مصر وصلت حاليا لفين مع صندوق النقد الدولي؟
خلال ايام مصر هتحصل علي شريحة بقيمة 1.2 مليار دولار ودي الشريحة الرابعة من قرض الـ8 مليار واللي مصر نجحت في الحصول علي موافقته في 2024.
