اقتناص الفرص الصعبة.. إزاي مصر هتجذب مليارات الدولارات من شركات أوروبا؟
في الفترة اللي فاتت، العلاقات بين مصر والاتحاد الأوروبي بقت متميزة جدا.. وحاليا مصر بتحاول تخلي الشراكة دي في صورة استثمارات.. ياتري مصر مستهدفة توصل بحجم استثمارات اد اية من دول الاتحاد الأوروبي.. وازاي مصر هتحقق الأرقام دي؟
مصر حاليا بتعد شريك استراتيجي مهم جدا لدول الاتحاد الأوروبي خصوصا بعد التفاهم والتنسيق اللي حصل بين مصر ودول الاتحاد الأوروبي وترفيع العلاقات بين الطرفين لمستوي الشراكة.
الشراكة اللي موجودة دلوقتي بين مصر ودول الاتحاد مصر بتحاول تترجمها لاستثمارات علي ارض الواقع، ومصر حاليا بتستهدف دخول استثمارات أجنبية من دول الاتحاد الأوروبي بقيمة مش هتقل عن 1.5 مليار يورو خلال 2025، خصوصا أن مصر عندها قطاعات كتيرة جدا بتعد هدف رئيسي للمستثمرين الأوروبيين زي قطاعات الطاقة الجديدة والمتجددة، وصناعة السيارات والصناعات المرتبطة بيها والتصنيع الزراعي والصناعات الهندسية والكهربائية.
طيب حجم استثمارات دول الاتحاد الأوروبي في مصر بيوصل لكام؟.
مصر في الوقت الحالي بتضم عدد كبير من شركات واستثمارات دول الاتحاد الأوروبي، وبيوصل حجم الاستثمارات الأوروبية لـ 32% من إجمالي الاستثمارات الأجنبية المباشرة الموجودة في مصر.
الحكومة أكدت أن دول هولندا وإيطاليا وفرنسا وبلجيكا وإسبانيا دول بيعدوا أهم دول الاتحاد الأوروبي اللي لها استثمارات في مصر، وبيوصل حجم الاستثمارات الموجودة لـ5 دول دول لـ 10.3 مليار دولار بما يعادل 78% من إجمالي استثمارات الاتحاد الأوروبي في مصر.
مش كده بس، لا ده كمان الحكومة بتستهدف زيادة صادراتها لدول الاتحاد الأوروبي بنسبة 15% بنهاية 2025، وحجم صادرات مصر غير النفطية لدول الاتحاد وصلت لـ 40 مليار دولار بنهاية 2024، والاتحاد الأوروبي حاليا بيعد الشريك التجاري الأول لمصر، وبيستحوذ علي 27% من إجمالي تجارة مصر الخارجية.
طيب ازاي الحكومة هتقدر تجذب كبري رؤوس الأموال من دول الاتحاد الأوروبي للدخول للسوق المصري؟.
مصر في الفترة اللي فاتت، أعلنت عن استراتيجية لجذب الاستثمارات الأجنبية المباشرة لمصر,، والاستراتيجية دي بتستهدف تنويع مصادر الدخل وتعزيز نمو القطاع الخاص، وه في أطار خطة الدولة لتعزيز مناخ الاستثمار في مصر وتحسين بيئة الأعمال التجارية لتحقيق نمو اقتصادي مستدام وتعزيز مكانة مصر كوجهة رئيسية للاستثمار في المنطقة.
الحكومة في الفترة اللي فاتت عملت اجراءات كتيرة لجذب رؤوس الاموال الأجنبية للدخول للسوق المصري سوءا من خلال التسهيلات الحكومية في تخصيص الاراضي لإقامة المشروعات والمصانع، وتجهيز البنية التحتية اللازمة لدخول الاستثمارات الاجنبية من طرق ومطارات وموانئ اللي الشركات بتحتاجها للتصدير، وكمان تبسيط الاجراءات واللي بقت كلها بتم من خلال جهة واحدة، ده غير القرارات الاقتصادية اللي قامت بيها الحكومة خلال الفترة اللي فاتت وتوحيد سعر صرف العملات الاجنبية مقابل الجنبية المصري، خصوصا أن السبب ده كان واحد من أهم اسباب خروج نسبة كبيرة من الاستثمارات الأجنبية الموجودة في مصر .
