السياحة طوق النجاة في 2025.. شوف الحكومة بتخطط لإيه في قطاع مهم؟
السياحة واحدة مهمة جدا من الحاجات اللي مصر شغالة عليها في 2025، واللي هيكون لها مستقبل كبير في تحقيق فائض دولاري لمصر هينعش خزينة الدولة المصرية.. هتري مصر مستهدفة توصل لكام سائح في 2025.. واية توقعات المؤسسات العالمية عن اعداد السائحين اللي هيجيوا مصر في 2025
السياحة واحدة من اهم مصادر الدخل الأجنبي لكل الدول، ومصر عندها هدف كبير أنها توصل لـ30 مليار دولار وتحقيق 30 مليون سائح في 2028، وفعلا مصر بدأت تشتغل علي الهدف ده من زمان، وده هيحصل من خلال زيادة عدد الغرف الفندقية لـ25 الف غرف فندقية، خصوصا في المنطقة المحيطة بالأهرامات المتحف المصري الكبير واللي طبعا العين عليهم دلوقتي مع الأخبار اللي أعلن عنها الدكتور مصطفي مدبولي رئيس مجلس الوزراء واللي قال أنه هيتم افتتاح المتحف المصري الكبير بشكل رسمي في 2025، وهيكون مفاجاة من مصر لكل العالم وهتغير خريطة السياحة العالمية بشكل كامل.
طيب التوقعات أننها نوصل بعدد السياحة لكام في 2025؟
مؤسسة فيتش سوليوشنز، توقعت أن مصر تحقق زيادة في عدد السياح الوافدين بنسبة 5.5% على أساس سنوي، وفي 2025 المؤسسة هتوصل لــ 16.8 مليون سائح.
المؤسسة قالت أنه علي المدى المتوسط، عدد السياح الوافدين هيرتفع إلى مصر خلال الفترة من 2025 إلى 2028 بمعدل نمو سنوي بنسبة 4.8%، وفي سنة 2028 مصر هتوصل لـ 18.8 مليون سائح مدفوعة بنمو أعداد السائحين الوافدين من أوروبا الشرق الأوسط وأمريكا الشمالية.
المؤسسة قالت أن عدد السائحين الوافدين هيساهم في تعزيز إيرادات السياحة الدولية، وتوقعت أنها ترتفع من 16.25 مليار دولار في 2024 إلى 17.44 مليار دولار في 2025، المؤسسة توقعت كمان زيادة عدد الوافدين من أوروبا في عام 2025 وهيوصلوا لـ 9.8 مليون سائح وده في حال استمرار زيادة عدد السائحين الوافدين من أوروبا، وهتكون الزيادة بمعدل نمو متوسط هيوصل لـ4.8٪ على أساس سنوي خلال الفترة 2024-2028، وهيوصل معدل الزيادة لـ 10.9 مليون سائح في عام 2028.
المؤسسة قالت كمان أن نمو السائحين الوافدين إلى مصر من الشرق الأوسط وصل في عام 2024 لـ7٪ على أساس سنوي، والرقم ده مرشح للزيادة لـ 3.7 ملايين في 2025.
المؤسسة قالت كمان، أن عدد السائحين الوافدين لمصر من دول قارة أمريكا الشمالية لمصر في 2024 وصل لـ؟ 624.7 ألف سائح وتوقعت أنه يرتفع في 2025 ويوصل لـ651 ألف سائح، وهيوصل لـ710.3 الف سائح في 2028.
طيب اية الاسباب اللي هتخلي حركة السياحة الوافدة لمصر ترتفع للارقام دي في الفترة اللي جاية؟
مصر حاليا شغالة علي اتجاهات كبيرة جدا علشان تعظم حركة السياحة الوافدة لمصر، ومركزة بدرجة كبيرة جدا علي الاثار واللي هيا طبعا الكنز المصري اللي مفيش زيه، وفي 2025 مصر هتعلن رسميا افتتاح المتحف المصري الكبير واللي هيكون سبب رئيسي في زيادة ومضاعفة عدد السائحين اللي جايين مصر لارقام متحققش قبل كده.
