بدون ضامن.. البنك ده هيديك قرض مليون جنيه والسداد على 10 سنوات
كتير من المصريين بيدوروا على سلفة أو قرض بشروط سهلة وميسرة عشان ينجزوا مصلحة لهم، مثلا يعملوا مشروع أو يجوزوا ابن أو بنت، أو يشطبوا شقتهم، فأسهل حاجة بتكون القروض البنكية.
عشان كده، البنوك المصرية بتقدم منتجات مصرفية كتيرة بتتناسب مع احتياجات العملاء والمتعاملين المتنوعة بسبب اختلاف وتفاوت شرائح الدخول والفئات العمرية، ومن أهم المنتجات البنكية اللي بتهم شريحة كبيرة من المتعاملين هي القروض.
ومن هنا بنك التعمير والإسكان بيقدملك القرض الشخصي، اللي من أهم مميزاته إنه بيكون بدون تقديم ضمانات، ومفيش شروط إلا تحويل الراتب بس، وممكن توصل قيمة التمويل لمليون جنيه.
والقرض الشخصي من بنك التعمير والإسكان، بيتميز بأنه في حالة استطاع المقترض تحويل الراتب على البنك للسداد، فبيتم رفع الحد الأقصى لقيمة التمويل إلى مليون جنيه، ولكن في حالة مافيش تحويل الراتب فبيتم صرف 500 ألف جنيه كحد أقصى للمقترض.
ومش شرط عشان تحصل على القرض ده، إن يكون موجود شخص ضامن، كمان القرض ده بيوفرلك سعر عائد مميز، يعني الفوائد اللي هيدفعها المقترض على القرض على مدار فترة السداد.
وفترات سداد بتصل ل10 سنوات، ودي من أهم مزايا القرض الشخصي من بنك التعمير والإسكان، وكمان من المميزات إصدار وثيقة تأمين على الحياة مجانية للعميل طوال فترة السداد، مع إتاحة مرونة لفترات السداد واللي بتتراوح بين 6 إلى 120 شهر، يعني فترة السداد بتمتد لحد 10 سنين بشرط تحويل الراتب على البنك للسداد زي ما قولنا، وفي حالة عدم توافر الشرط ده، فأطول فترة سداد ممكنة هتكون 5 سنين .
ولكن، بيشترط على الراغب في الحصول على القرض الشخصي للموظفين أن سنه لا يقل عن 21 سنة، ومايزدش عن 60 بنهاية فترة السداد، فخلي بالك من عامل السن ده أوي عشان ورقك مايترفضش.
كمان، لازم تقدم صورة البطاقة الشخصية، بس تكون سارية، ومطلوب كمان إيصال مرافق أو خدمات حديث، ومايكونش مر عليه أكثر من 3 شهور، فخلي بالك من المدة كويس.
ومن ضمن الأوراق المطلوبة كمان، بيان مفردات الراتب، المعتمد من جهة العمل، أو كشف حساب بنكي لآخر 6 شهور، وبس كده يا سيدي، فلو حضرتك محتاج قرض سريع لم ورقم واطلع على أقرب فرع لبنك التعمير والإسكان وانجز قرضك بسرعة.
