أفضل شهادات الاستثمار ذات العائد المرتفع في مصر 2025
إيه أكتر طريقة آمنة ومضمونة تضاعف بيها فلوسك في 2025؟ وإيه البنوك اللي بتقدم أعلى عائد على شهادات الاستثمار؟ وهل شهادات الاستثمار لسه تستحق إنك تحط فيها فلوسك؟.. لو عاوز تعرف إجابات للأسئلة دي لازم تكمل معانا لآخر التقرير.
بص يا سيدي.. في ظل الظروف الاقتصادية الصعبة اللي بنعيشها في آخر 3 سنين .. كل واحد فينا بيدور على مكان يحط فيه فلوسه بأمان لكن مش أي مكان... مكان يضمنلك عائد محترم وكمان يحمي قيمة فلوسك من التضخم.. وهنا بتيجي فكرة شهادات الاستثمار
في 2025 البنوك في مصر بتتنافس بشكل غير مسبوق علشان تقدم شهادات استثمار بعوائد مغرية.. لأن البنك المركزي رفع أسعار الفايدة أكتر من مرة علشان يواجه التضخم ويحافظ على استقرار السوق وده انعكس على شهادات الاستثمار اللي بقت تقدم عوائد أعلى مقارنة بالسنين اللي فاتت
بس السؤال المهم.. إيه هي أفضل شهادات الاستثمار اللي تستحق تحط فيها فلوسك؟وإيه المدة والعائد اللي يناسبك أكتر؟
ندخل في الجد ونتكلم عن أهم الشهادات اللي متاحة دلوقتي وأولها شهادة البنك الأهلي المصري (بلاتينية) العائد بتاعها 20% سنوي على الشهادة ذات العائد الثابت ومدتها 3 سنين و تقدر تستلم العائد شهريًا أو ربع سنوي.. ودي واحدة من أكتر الشهادات شعبية في السوق ودايمًا بتكون اختيار أول لناس كتير بسبب الثقة في البنك الأهلي
فيه كمان شهادة بنك مصر (القمة) بعائد 19.5% سنوي ثابت ومدتها 3 سنين والعائد ثابت ومناسب جدًا لو بتدور على استقرار..وبنك مصر بيقدم دايمًا حلول متوازنة تناسب كل الفئات والشهادة دي مناسبة للناس اللي بتدور على عائد منتظم وثابت
نروح لشهادة بنك CIB (التجاري الدولي) اللى بتقدم 18% على الشهادات ذات العائد الثابت و22% على الشهادات المتغيرة والمدة بتكون من سنة لـ3 سنين وميزة الشهادة المتغيرة انها بتواكب أي تغييرات في أسعار الفايدة اللي يعلن عنها البنك المركزي ولو بتحب تستفيد من تحركات السوق الشهادة المتغيرة هي الأنسب ليك.
فيه منات شهادة بنك القاهرة (بريمو جولد) بعائد 19.75% سنوي لمدة3 سنين وبتقدم خيار مرن للعائد، سواء شهري، ربع سنوي، أو سنوي..وبنك القاهرة بيقدم حلول مميزة دايمًا ودي واحدة من الشهادات اللي لازم تفكر فيها لو عايز عائد مرتفع
طب دلوقتي.. إزاي تختار الشهادة اللي تناسبك؟
لو محتاج فلوسك قريب اختار شهادة مدتها سنة أما لو مش مستعجل الشهادات الطويلة بتقدم عائد أعلى.. ولازم كمان تفكر فى نوع العائد.. هل تفضل عائد ثابت تضمنه طول مدة الشهادة؟ ولا تحب عائد متغير ممكن يزيد مع الوقت؟.. بالاضافة كمان لطريقة صرف العائد .. لو بتحتاج دخل شهري اختار شهادة بتدي عائد شهري.. أما لو عايز تستثمر على المدى الطويل، العائد السنوي هيكون أفضل
