نبوءة جولدمان ساكس والمنصات العمياء.. صراع الفوضى والدولار
الحكاية مش دولار ولا أسعار ولاغلاء، ولا عمرها هتكون أسباب حقيقية، لكن الموضوع اكبر من كده بكتير. مصر الهدف واللي بيحصل واللي بيتروج ليه مش صدفة.. تعالوا نعرف مع بعض القصة ومافيها.. تابعونا للآخر وهتعرفوا التفاصيل في الفيديو ده
اللي بيحصل على مواقع التواصل الاجتماعي والسوشيال ميديا والحملات المنظمة والتحريض ضد الدولة والقيادة والحكومة مش طبيعي وبيكشف حجم المؤامرة الخفية اللي مستخبية ورا ستار الدولار وارتفاع الأسعار واللي اتخذتها منصات الشر وأجهزة خفية واجندات معادية ذريعة ونقطة انطلاق لهجوم والتحريض ضد الدولة والغريبة أن كل الحملات انطلقت في وقت واحد وبتستخدم نفس اللغة والمصطلحات زي الدولار هيولع وهيخسف بالجنيه الأرض ومش هنقدر تسدد الديون الخارجية ومصر بتتسول وباعت أرضها وشركاتها للخلايجة وكلام كتير هدفه تسويد الصورة وبث الوهن واليأس في نفوس المصريين.
طبعاً كل دي أكاذيب والعكس هو الصحيح اولا سعر الدولار بيرفع قدام عملات العالم كله مش قدام الجنيه المصري بس ودا من ساعة ما وصل ترامب لحكم أمريكا وإعلان سياسته لدعم الدولار واللي بيعتبر العملة العالمية في التجارة والتطاول وفي القروض والمنح والبترول والدهب وكل الأسواق فطبيعي سعره يزيد وكمان الدولار سعره بيحدده سوق العرض والطلب والمركزي قادر يخفض سعره ويثبته عند مستوى معين لكن هتكون النتيجة ظهور السوق السودا من تاني وهروب المستثمرين وتوقف برامج الإصلاح الاقتصادي واختفاء قواعد الاقتصاد السليمة اللي فرشت الطريق لانطلاق الاقتصاد المصري.
ممكن حد يقول فين الاقتصاد المصري من ارتفاع أسعار الدولار والسلع ؟
هنرد على حضرتك ونقول إن سعر الدولار مش مقياس لقوة اي اقتصاد بدليل انخفاض سعر الين الياباني قدام العملة الأمريكية ومع ذلك محدش قال الاقتصاد الياباني ضعيف وكمان كل المؤشرات الاقتصادية بتقول إن الاقتصاد المصري بيتعافي وبيحقق نجاحات غير مسبوقة في تاريخ مصر بداية من البنية الأساسية والاستثمار والمشروعات العملاقة في كل القطاعات الاقتصادية سواء تجارية أو سياحية أو صناعية أو زراعية واللي بيحصل دلوقتي نهضة العالم كله بيتكلم عليها وخلى الشركات العالمية تيجي مصر وتوطن فيها مصانعها ودا غير الفنادق العالمية اللي هجمت على مصر لبناء فنادق فيها مع الصحوة القادمة في قطاع السياحة.
كل التطورات الاقتصادية والانجازات خلت بنك عالمي وليه سمعته زي جولدمان ساكس يقول إن مصر هتكون اقوى اقتصاديات العالم خلال سنين قليلة إذا استمر بنفس التقدم والتنمية الحالية وهيوصل الناتج المحلي ل10 تريليون دولار وبنك عالمي زي جولدمان ساكس مش هقول اي توقعات وخلاص وخاصة انه متكلمش عن الحالة المصرية بس لكن نشر توقعات لدول تانية يعني مش بيجامل مصر ودا يخلينا نتأكد أن التشويه اللي بيحصل مدبر ولعب بالنار واستغلال خبيث للي بيحصل حولينا في المنطقة لإرهاب المصريين أن الخراب قادم في وقت بتسابق فيه الزمن عشان تبني دولة قوية في كل المجالات وعندها كل مفاتيح القوة اللي قادرة تحميها من اي مخطط خبيث.
واحنا بنعترف بصعوبة الوضع المعيشي مش لازم ننسي إن الوضع كان هيبقي أسوأ من كده بكتير وسط فوضى عارمة في المنطقة ودولتك الوحيدة المستقرة والصامدة وسط النار ولولا الإصلاحات والانجازات اللي اتنفذت كان الوضع هيبقي أخطر بكتير فلازم نخلي بالنا من مخططات الشر واللعب بالنار لنشر الفوضى والخراب ودا هدفهم اللي بيستميتو عشان ينفذوه.
