تطور جديد وتحالفات عالمية.. مصر راجعة مركز إقليمي لإنتاج الغاز

إيه اللي بيحصل في ملف الغاز الطبيعي المصري دلوقتي وازاي مصر راجعة بقوة تكون مركز إقليمي لإنتاج وتسويق الغاز الطبيعي لاوروبا والمنطقة وايه قصة التحالفات العالمية الجديدة اللي هتشتغل في مجال التنقيب في مصر.. كل التفاصيل هنعرفها في التقرير ده خليكم معانا للآخر

 
مصر من الدول القليلة في حوض المتوسط اللي عندها بنية قوية لتسييل الغاز الطبيعي من محطات الاسالة في ادكو ودمياط والمحطات دي أدت لمصر قوة في الملف الغاز وبقت تستقبل الغاز الطبيعي الخام المستخرج من محطات الدول القريبة في المتوسط ومع اكتشاف حقل ظهر بقت مصر بتنتج غاز بكميات كبيرة وصدرت منه ب8 مليار دولار في سنة من السنين قبل ما يتناقص إنتاج الغاز في الحقل لظروف طبيعية وظروف تانية خاصه بعمليات تنمية الحقل ودا لأن الشركات العالمية وقفت مؤقتاً عمليات التطوير في الحقل القديم بسبب مستحقاتها عند الحكومة المصرية

طيب ايه اللي بيحصل دلوقتي في ملف الغاز ؟
شوف حضرتك الشركات العالمية اخدت معظم مستحقاتها ونتيجة لدا رجعت تستنأنف نشاطها في عمليات تنمية الحقول المصرية ومنها حقل ظهر القديم عشان يرجع لنفس معدلات الإنتاج وبتقول القديم عشان فيه مفاجأة هنقولكم عليها دلوقتي 
المفاجأة أن حقل ظهر بيقع ضمن امتياز واسع جدا وامتياز يعني المساحة اللي من حق الشركات الأجنبية تنقب فيها ضمن حدود المياه الإقليمية المصرية وكل منطقة الامتياز دي واسمها  شروق تم حفر حقل واحد فيها وهو حقل ظهر والجديد بقي أن  شركة بريتش بتروليوم (BP.L) وذراع الاستثمارات الدولية لشركة أبوظبي الوطنية للبترول “أدنوك” أعلنوا من ساعات عن إبرام صفقة لمشروع مشترك جديد للغاز الطبيعي في مصر، في وقت تعمل فيه أدنوك الإماراتية على توسيع جهودها للنمو في الخارج، بينما تعزز بريتش بتروليوم من وجودها في مصر.

شركة بترول أبوظبي الوطنية (أدنوك) قالت في بيان ليها إن تم الانتهاء من عملية الإغلاق المالي وتشكيل مشروعها المشترك الجديد ومنصة الغاز الطبيعي الدولية المشتركة والمعروفة  باسم شركة أركيوس إنرجي واللي بتتوزع ملكيتها  بنسبة 51٪ لشركة بريتش بتروليوم و49% لشركة XRG، شركة الاستثمار التحويلية التابعة لشركة أدنوك.

المهم  الرئيس التنفيذي لشركة “بي بي” قال في البيان إن شركة أركيوس إنرجي بتجمع نقاط القوة في الشركتين لإنشاء منصة ديناميكية جديدة للنمو الدولي في الغاز الطبيعي في المنطقة وأن مصر مركز لفرص جديدة لبناء محفظة غاز تنافسية للغاية في المنطقة يعني التحالف الجديد بين عمالقة التنقيب هيركز على مصر في الفترة الجاية بسبب الفرص الاستثمارية الواعدة في قطاع الغاز الطبيعي المصري.
كمان كريم بدوي، وزير البترول والثروة المعدنية كشف من ساعات إن شركة إيني الإيطالية بتستعد دلوقتي لحفر بئرين جديدتين في حقل غاز ظهر بنهاية ديسمبر الحالي، بهدف زيادة الإنتاج بمقدار 220 مليون قدم مكعبة من الغاز يوميًا وإن المؤشرات إيجابية  ودا غير إن الوزارة طرحت 61 فرصة استثمارية لزيادة الاستكشاف والإنتاج في مناطق البحر المتوسط والصحراوين الشرقية والغربية، وتشمل تشجيع أنشطة إنتاج الزيت الخام من الحقول المتقادمة باستثمارات ملائمة.