مصر تبدأ رحلة الخلاص من كابوس الديون.. شو إيه اللي بيحصل في الكواليس وإيه خطة الحكومة
يا ترى مصر بتفكر إزاي فى ملف الديون الخارجية؟ وازاى الحكومة بتخطط لتقليل حجم الديون لأقل حد ممكن؟ ومصر أصلا عليها ديون أد إيه؟
الاقتصاد المصري في الفترة الأخيرة مر بظروف صعبة بسبب تراكم الديون على مدار السنين وفي وقت من الأوقات الدين الخارجي تضاعف من 46 مليار دولار في 2014 لغاية ما وصل لحدود 168 مليار دولار في ديسمبر 2023.. لكن الخبر الحلو هنا إن الحكومة بدأت تاخد خطوات كبيرة عشان تخفض حجم الديون.
في يونيو 2024 الدين الخارجي انخفض بشكل ملحوظ ووصل لحد 153 مليار دولار بعد ما كان 168 مليار في ديسمبر 2023 يعني الحكومة خفضت 15 مليار دولار.. و ده بيحسن الموازنة العامة للدولة بشكل كبير.. كمان الدين المحلي رغم إنه لسه مرتفع إلا إن الحكومة نجحت في تقليصه بنسبة 2.7%، ووصل لحد 8.7 تريليون جنيه مقارنة بـ 8.9 تريليون في مارس 2024
طب إيه بقى معنى الكلام ده؟
معناه إن مصر بقت بتقدر تدير ديونها بشكل أفضل وإن الحكومة بتشتغل على خطة جديدة عشان تكمل خفض الديون.. وزير المالية أحمد كجوك قال إن الاستراتيجية الجديدة دي هتتعلن في الربع الأول من 2025 وبتهدف لخفض نسبة الدين إلى الناتج المحلي الإجمالي لحد 85% خلال العام المالي الحالي مقارنة بمعدل 96% دلوقتي يعني الحكومة عايزة تريح نفسها من عبء الديون بشكل تدريجي وتقلل الفوائد اللي بتدفعها بشكل مستمر
لو اتكلمنا عن الأثر الحقيقي للموضوع ده على الناس العاديين هنلاقي إن خفض حجم الديون وفوائدها يعني إن الحكومة هتقدر تخصص فلوس أكتر لتطوير القطاعات المختلفة زي التعليم والصحة مش هتكون محكومة بتسديد فوائد ديون كبيرة طول الوقت وده هيساهم بشكل كبير في تحسين الموازنة العامة
ولكن علشان الحكومة تنجح في ده هتحتاج تتابع مجموعة من الإجراءات منها مثلاً إعادة هيكلة سياسة الاقتراض بشكل أفضل وده بيعني إنهم هيبدأوا يقللوا من الاقتراض الخارجي ويركزوا على أدوات تمويل داخلية زي الصكوك والسندات اللي هتكون تكلفتها أقل بكتير من الاقتراض التقليدي وده ممكن يساعد في توفير فلوس أكتر لتحسين الأوضاع المعيشية
وفي إطار نفس الفكرة الحكومة كمان هتستخدم حصيلة بيع الأصول الحكومية لسداد جزء من الديون وفيه قانون بيقول إن 50% من إيرادات بيع الأصول هتروح لوزارة المالية وده يعني إن الحكومة هتقدر تقلل الديون بشكل أسرع
لكن أهم حاجة هنا هي فكرة تحويل الديون لاستثمارات ان ده معناه انه مش بس سداد الديون لكن استبدالها باستثمارات هتدّينا دخل مستمر مثال على ده هو صفقة "رأس الحكمة" اللي من خلالها تم تحويل جزء من الدين الخارجي لاستثمار في مشاريع تدر دخل
وفي النهاية لو خطط الحكومة نجحت وابتدت تحقق الأهداف دي ممكن نشوف تحول اقتصادي جوهري في مصر. مش بس هتخف الديون لكن هيكون في فرص استثمارية جديدة في السوق المصري، مما يعني إن مصر هتقدر تركز على النمو الحقيقي بدل ما تكون عايشة تحت وطأة الديون.
