غول الاستثمارات النرويجي هيدخل مصر.. السيسي جاب القاضية

ليه الرئيس السيسي كان حريص في جولته الأخيرة في أوربا أنه يزور النرويج تحديدا وايه السر في الزيارة وايه علاقة الاستثمار بزيارة الرئيس وايه كمان حكاية وحش الاستثمارات النرويجي اللي بيتسعد يدخل مصر .. خليكم معانا للآخر وهتعرفوا التفاصيل في الفيديو ده 
 

كلنا متابعين جولات الرئيس السيسي في أوروبا الأيام الأخيرة ورغم الأحداث اللي المنطقة بتعيشها لكن الرئيس السيسي بيلف العالم عشان مصلحة مصر اولا وأخيرا ويفتح ابواب تعاون استراتيجي جديد مع دول العالم زي ما حصل في الاتفاقية مع الدنمارك واللي تم فيها ترفيع العلاقات الى المستوى الاستراتيجي ودا معناه أولوية الدنمارك في الاستثمار هتكون لمصر في المنطقة ودا غير فتح أسواقها للمنتجات المصرية ونقل الخبرات والصناعات والتكنولوجيا وكل انواع التعاون الممكنة.

بعد زيارة الدنمارك الرئيس السيسي زار النرويج وناس كتير ممكن تسأل اشمعنا النرويج وسر الاستقبال الخاص للرئيس المصري والحفاوة الكبيرة لضيفها الكبير.. اولا لازم ناكد إن الرئيس السيسي لما يروح يزور اي دولة بيتم التعامل معاه أنه رئيس أكبر وأقوى وأعرق دولة في الشرق الأوسط والقوى الإقليمية الأولي في جنوب حوض المتوسط ودا غير الكاريزما الخاصة بالرئيس السيسي نفسه وعشان كده شفنا طبيعية الاستقبال الخاص برئيس مصر..

نرجع لسؤالنا ليه النرويج.. عشان حضرتك النرويج فيها مثلا أكبر صندوق استثمار سيادي على ضهر الكوكب وهو صندوق الثروة السيادي النرويجي، واللي ليه استثمارات ضخمة في دول كتير حولين العالم وبيلعب في حوالي 2 تريليون دولار أي زي ما حضرتك سمعت كده 2 تريليون دولار مش مليار وتقدر تتخيل دولة عندها صندوق سيادي بالقيمة والحجم دا الاقتصاد بتاعها يكون عامل ازاي وعشان كده الرئيس السيسي كان حريص إنه يقدم ملف الاستثمارات عن أي ملف تاني..

ملك النرويج عمل احتفال خاص على شرف الرئيس السيسي والوفد المرافق ليه والرئيس السيسي قال كلمة شكر طبعا على مأدبة العشاء واستغل الفرصة قدام قادة النرويج ودعا الشركات النرويجية العملاقة إلى الاستثمار في مصر وأشار الرئيس السيسي إلى تبني  الحكومة المصرية، خطة طموحة لتحسين مناخ الاستثمار،وتعزيز دور القطاع الخاص فى قيادة التنمية الاقتصادية ودا من خلال توفير حوافز وتسهيلات للمستثمرين الأجانب، وتذليل أية عقبات قد تواجههم.

وفي كل لقاءات الرئيس مع المسؤولين النرويجيين اكد السيسي على  أهمية تعزيز التعاون الاقتصادى والاستثمارى بين البلدين وجذب الاستثمارات الأجنبية المباشرة للسوق المصرى واللى بيوفر العديد من الفرص فى مختلف القطاعات الحيوية ذات الأهمية المشتركة زي الطاقة بمصادرها التقليدية والجديدة والمتجددة والخضراء، والنقل، والبنية التحتية، والصناعة، والزراعة، وتكنولوجيا المعلومات والاتصالات واستغلال الموقع الجغرافى الاستراتيجي والفريد لمصر.. طبعا الشركات النرويجية رحبت بالاستثمار في مصر واستغلال الفرص المتاحة في كل قطاعات الاقتصاد المصري واكيد هنشوف استثمارات لصندوق الثروة النرويجي في مصر قريب جدا لأن الصناديق السيادية دي بتمشي بتوجيهات سياسية وهدفها تعميق التعاون مع الدول الصديقة.