صعود الدولار مؤقت ولا مكمل معانا كتير؟.. مفاجأة في التفاصيل
في الكام يوم اللى فاتوا أسعار الدولار بتكسر أرقام قياسية وبنهاية تعاملات امبارح وصلت لـ50.56 جنيه للبيع.. فيا ترى ايه اللى بيحصل فى سوق الصرف ؟ وليه الدولار بيشهد تحركات متتالية فى التعاملات الأخيرة؟ وهل الارتفاعات دي هتيتمر ولا ممكن تووقف عند مستوى معين ؟ والأهم هل الجنية قادر على تحقيق ريمونتادا مكن جديد ولا كده خلاص مفيش انخفاض تانى للدولار؟
أول حاجة لازم نبص عليها إن سعر الدولار مقابل الجنيه من بداية نوفمبر اللي فات قفز حوالي 3% يعني زاد 1.5 جنيه في أقل من شهر والرقم ده بحسب بيانات ومؤشرات البنك المركزي المصري
طب السؤال.. ليه الارتفاعات دي حصلت؟
الخبراء بيقولوا إن القصة ببساطة هي زيادة الطلب على الدولار في السوق.
وليه فيه طلب كبير؟
أولاً مستثمرين أجانب كتير قفلوا استثماراتهم وخرجوا من السوق المصري مع نهاية السنة.. وثانياً التزامات كتير بالدولار زي سداد ديون خارجية ومدفوعات استيراد ضخمة كل ده بيزود الضغط على الجنيه .. لكن ده مش كل حاجة.. التحليل بيقول إن الحكومة ماشية بسياسة "سعر الصرف المرن" يعني مفيش تثبيت لسعر العملة زي زمان والسعر بقى بيتحدد بالعرض والطلب.. وده بيخلّي أي زيادة في الطلب على الدولار تأثر على سعره بشكل مباشر
وهل الدولار هيستمر في الارتفاع؟
التوقعات بتقول إن الدولار مكمل فى الارتفاع وممكن يوصل ل 4 أو 5% زي ما قال رئيس الحكومة من كام يوم خصوصا مع موسم أعياد رأس السنة اللي دايماً بيشهد طلب عالي على العملة الأجنبية
لكن هل ده معناه إن الوضع هيستمر كده؟
فيه محللين كتير شايفين إن الضغوط الحالية على الجنيه مؤقتة وإن مع بداية السنة الجديدة ممكن الأمور تهدى شوية.. لأن فيه توقعات بدخول تدفقات استثمارية جديدة، سواء من مستثمرين عرب أو طروحات حكومية.. كمان مع هدوء التوترات الجيوسياسية في المنطقة السوق هيبدأ يتنفس وده ممكن يساعد على استقرار الجنيه.. بس فيه نقطة مهمة هنا..مش بس التوترات الجيوسياسية اللي بتضغط على الجنيه التضخم كمان عامل رئيسي وكل ما معدلات التضخم تعلى الجنيه بيتراجع أكتر قدام الدولار
السؤال اللي بدأنا بيه.. هل الارتفاعات التاريخية للدولار هتستمر؟
الإجابة ببساطة كل حاجة دلوقتي معتمدة على العرض والطلب.. لكن الخبراء متفقين إن الوضع الحالي مؤقت.. ممكن نشوف ارتفاعات خلال الشهر الجاي لكن مع بداية 2025 في احتمالية كبيرة إن الأمور تهدى شوية.. لكن اللى الكل متفق عليه ان الدولار متوفر فى البنوك وان الشركات والمستوردين بيتوفرلهم المبالغ اللى محتاجينها فمفيش داعي خالص للقلق
