تحرك مهم في ملف الديون.. هل مصر ممكن تسدد كل ديونها؟

هو إيه حكاية اعلان مصر استراتيجية خفض الدين العام في الربع الأول من 2025؟ الكلام ده معناه إيه ؟ وهل ممكن مصر فعلاً تصفر ديونها؟و إزاي الحكومة بتفكر في ملف الدين العام؟ وإيه تأثير الخطة الجديدة على الاقتصاد والمواطن؟.. لو عاوز تعرف اجابات الأسئلة دي كلها شوف الفيديو ده للآخر

فيه خطة مهمة  جدًا الحكومة المصرية شغالة عليها بتركيز شديد وهي "استراتيجية خفض الدين العام".. وزير المالية  أحمد كجوك أعلن مؤخرا إن الخطة دي هتكون جاهزة للإعلان خلال الربع الأول من 2025

طب إيه هي الاستراتيجية دي؟ وإيه معناها وتأثيرها على اقتصادنا وحياتنا اليومية؟

الفكرة ببساطة إن الحكومة عايزة تخفض نسبة الدين العام لـ 85% من الناتج المحلي الإجمالي خلال السنة المالية الحالية.. وعايزين الدين يكون أقل من قيمة الاقتصاد اللي بتنتجه مصر وده بيحسن صورة الاقتصاد قدام المستثمرين وبيخفف الضغط على الميزانية العامة للدولة

طيب إيه اللي مختلف في الخطة دي؟
الوزير وصفها إنها هتكون أكتر اتزانًا وشمولًا.. يعني مش مجرد خطة لتقليل الدين لكن كمان هتراعي إن الاقتصاد يفضل يتحرك وينمو بشكل صحي.. مصر شغالة على تحسين التمويل المالي عشان توفر فلوس بأسعار فائدة أقل وتطول فترة سداد الديون الفكرة هنا إنك تتجنب الاستدانة قصيرة الأجل اللي بتضغط على الموازنة

طب ده هيحصل إزاي؟
في سبتمبر اللي فات الحكومة المصرية أعلنت برنامج مدته 3 سنين من 2024الى 2027 والبرنامج ده بيركز على تحسين جودة التمويل المالي وخفض احتياجات التمويل الإجمالية وكمان توفير حوافز لدعم الأنشطة الاقتصادية.. بمعنى إنهم بيحاولوا يقللوا اعتمادنا على القروض العالية التكلفة ويركزوا أكتر على التمويل الذكي اللي يدعم الاقتصاد

الحكومة كمان بتجهز برنامج جديد لدعم الصادرات هيتم إطلاقه في يوليو 2025.. وزير المالية قال إن البرنامج ده هيكون "قوي وطموح" وهدفه الأساسي إنه يزود عوائد الصادرات بشكل كبير ومن الحاجات المهمة في البرنامج الجديد سداد كل متأخرات دعم الصادرات للشركات والتعامل بمرونة أكتر مع ملف التصدير وده طبعًا بعد الانتقادات اللي حصلت على البرنامج الحالي اللي خفض نسب الدعم بحوالي 70%

طب إيه كمان على أجندة الحكومة؟
الوزير أعلن عن مبادرتين جديدتين مبادرة لدعم الشركات الصناعية لزيادة خطوط الإنتاج ومبادرة تانية بالتعاون مع وزارة البترول لتحفيز استخدام الطاقة البديلة، وده هيكون أكتر كفاءة وتوفير للدولة وللمستثمرين.

وإيه تأثير ده كله على المواطن؟

أول حاجة لما الديون تقل الفوائد اللي بتتدفع عليها هتقل وده يخفف الضغط على ميزانية الدولة والفلوس اللي كانت بتتصرف على الفوائد دي ممكن تتوجه لحاجات تانية زي التعليم والصحة والبنية التحتية ودعم الصادرات يعني مصانع أكتر بتشتغل وفرص عمل جديدة بتتفتح