اتفاقية مهمةهتحل أزمة قطع الكهربا وتوقف المصانع.. مصر بتعمل عظمة مع الأمريكان

فكرت قبل كده إيه أهمية الغاز الطبيعي لمصر؟ طب هل هو مجرد مصدر طاقة ولا الموضوع أكبر من كده؟ إزاي تضمن مصر استمرارية إمدادات الغاز الطبيعي وسط الطلب المتزايد؟

في البداية كده لازم نكون عارفين ان الغاز الطبيعي  مش بس مصدر طاقة ده بيأثر على حياتنا اليومية بشكل مباشر في مناحي كتير زي المصانع اللي شغالة وبتنتج وزي شركات الأسمدة وغيرها من اللى بيعتمدوا على الغاز بشكل أساسي.. و الحكومة مهتمة جدا انها تضمن استمرارية إمدادات الغاز الطبيعي وعشان كده وقعت اتفاقية جديدة مع شركة "نيوفورترس" الأميركية لاستئجار وحدة تغييز عائمة

طب الاتفاقية دي هتأثر علينا إزاي؟ وإيه أهميتها الاقتصادية لمصر في الفترة الجاية؟

في خطوة استراتيجية ضخمة مصر وقعت مع شركة "نيوفورترس" الأمرdكية اتفاقية لاستئجار وحدة تغييز عائمة.. الوحدة دي هتكون الثانية في السوق المصري وهدفها الرئيس هو استقبال وتخزين الغاز الطبيعي المسال وتحويله للحالة الغازية علشان يتوجه مباشرة إلى الشبكة القومية للغازات الطبيعية..و الفكرة دي مش جديدة لكن في الوقت اللي بنواجه فيه زيادة كبيرة في الطلب المحلي الحل ده بيعتبر خطوة كبيرة لتأمين الإمدادات وزيادة قدرة القطاع على تلبية احتياجاتنا

والوحدة الجديدة هتكون سعتها التخزينية 160 ألف متر مكعب من الغاز الطبيعي المسال.. مش بس كده ده مع قدرة تغييز تصل إلى 750 مليون قدم مكعب يومياً.. يعني باختصار هتساعد في ضمان تدفق الغاز بكميات ضخمة لمختلف القطاعات الاقتصادية خاصة في أوقات الذروة الصيفية اللي بيزيد فيها الطلب على الطاقة

وحدة التغييز دي هتتواجد على الرصيف البحري لميناء "سوميد" في العين السخنة والمفروض إن التشغيل يبدأ في النص التاني من 2025.. ده معناه إن البنية التحتية لقطاع الغاز الطبيعي في مصر هتتطور بشكل كبير وده هيساهم في تحسين استدامة الإمدادات بشكل مستمر

حد ممكن يسأل ويقول  إيه الفايدة الاقتصادية للاتفاقية دي؟

فيه فوايد كتير أهمها ان ده بيحسن قدرة مصر على تأمين إمدادات الغاز خلال فترات ذروة الاستهلاك وهيساهم في استقرار إمدادات الكهرباء، اللي بيؤثر بشكل مباشر على حياتنا اليومية وعلى قطاعات زي الصناعة.. كمان الاتفاقية دي جزء من استراتيجية الدولة المصرية لزيادة الاعتماد على الطاقة المتجددة وتحقيق التوازن بين مصادر الطاقة المختلفة يعني مصر مش بس بتحقق استقرار الطاقة لكنها كمان بتسعى لمستقبل أكثر استدامة

وخد بالك وفقا لبنود الاتفاقية فشركة "نيوفورترس" مش شريك تقني وبس لكن كمان شريك اقتصادي مهم.. و الشركة دي من الشركات الرائدة عالميًا في تقنيات الغاز الطبيعي المسال ومع سمعتها في تقديم حلول موثوقة وبأسعار تنافسية هتساعد مصر في الحصول على تكنولوجيا حديثة وخدمات فعّالة بتكلفة أقل

باختصار الاتفاقية دي مش مجرد صفقة تجارية ولكنها خطوة استراتيجية هتساهم في ضمان استقرار إمدادات الغاز الطبيعي في مصر وتساعد في تلبية احتياجاتنا في المستقبل القريب