مصر هتجيب منين 23 مليار دولار لتسديد ديون 2025

مطلوب من مصر تسدد 23 مليار دولار ديون وفوايد السنة الجاية يعني تقريبا بمعدل مليار دولار كل شهر.. هتجيبهم منين وإزاي مصر قدرت تسدد 33 مليار دولار في 2024 بدون أزمات أو نقص للدولار في سوق الصرف.. التفاصيل هنعرفها في الفيديو ده خليكم معانا للآخر

الحقيقة نجاح الحكومة والبنك المركزي في ملف الديون الخارجية لغاية دلوقتى يدرس في علوم الاقتصاد لأن الحكومة سدتت مليارات الدولارات في 2024 وهي لسه طالعه من أصعب واخطر أزمة عملة وكمان عشان سددت المبالغ دي والي وصلت في السنة المالية اللي عدت33 مليار دولار ومن غير ما تحصل اي أزمات كبيرة أو يحصل نقص في العملة الأمريكية وبالعكس الناس معرفتش إن مصر سددت المبالغ دا كله غير من بيانات الحكومة والبنك المركزي المصري واللي لعب دور أساسي في تدبير الدولار لتسديد اقساط الديون.

طيب هي مصر هتسدد كام في 2025 ديون وفوايد؟

شوف ياسيد تقرير الوضع الخارجي الصادر عن البنك المركزي المصري الأخير كشف إن قيمة الأقساط وفوائد الديون المستحقة على مصر خلال  2025  بتوصل لـ 22.46 مليار دولار، بزيادة 900 مليون دولار عن تقديراته السابقة وبيتوزع مبلغ خدمة الدين بين 13.778 مليار دولار بالنص الأول من السنة المالية و8.663 مليار دولار  خلال النص التاني.

وبالارقام انخفض إجمالي الدين الخارجي بحوالي 7.7 مليار دولار، خلال الربع التاني من العام الجاري إلى 152.9 مليار دولار في يونيو اللي فات 160.6 مليار دولار في مارس اللي قبله وتراجع رصيد الدين الخارجي طويل الأجل 8.6 مليار دولار، خلال الربع التاني من العام الجاري وسجل 126.9 مليار دولار بنهاية يونيو اللي فات مقابل  135.3 مليار دولار بنهاية مارس الماضي، ما أدى إلى تراجع نسبته من إجمالي الدين الخارجي إلى 83% بدلًا من 84.2%.

وبحلول نهاية يونيو 2024، بلغت الديون قصيرة الأجل حسب الآجال المتبقية 52.8 مليار دولار، والديون طويلة الأجل  100.1 مليار دولار.
طيب الدولة هتسدد ال23 مليار دولار دول منين؟
الإجابة بسيطة خالص زي ما سددت الديون في 2024 هتسدد في 2025 وعلى فكرة سنة 2024 هي اكتر سنة هنسدد فيه ديون كبيرة يعني كل الأقساط اللي جاية هتكون أقل من اللي سددناه في السنة دي ومصر عندها موارد كولايةةكل يوم بتزيد اكتر واكتر ودي الحاجة المطمئنة في ملف الديون ومثلا مصر بتشهد دلوقتي أكب تدفق استثمارات في تاريخها وبدأت براس الحكمة وبعدها بدأت تدفقات الاستثمار في كل القطاعات وبخاصة في السياحة والصناعة والطاقة النظيفة ومصر استقبلت مشروعات مليارية في الشهور الأخيرة واتكلمنا عنها كتير هنا في بانكير وضربنا مثل أن فيه مشروعين بس الامونيا والطاقة الشمسية استثماراتهم لوحدهم 20 مليار دولار.
كمان من الموارد التانية اللي هتخلي مصر تسدد ديونها الخارجية في 2025 وهي مرتاحة الزيادة المستمرة في الصادرات ومصر حققت مثلاً زيادة في الصادرات غير البترولية إلى 33.35 مليار دولار خلال الأشهر العشرة الأولى من العام الحالي ودا غير كمان الارتقاع القياسي في تحويلات المصريين بالخارج وبالإضافة الي إيرادات السياحة وقناة السويس والطروحات الحكومية وسندات الخزانة وعندها كمان احتياطي نقدي تاريخي.
وفيه كمان حلول تانية لتقليل الديون من غير ما ندفع ولا دولار وهي تحويل جزء من الديون الي استثمارات زي ما حصل مع الإمارات كده ودخلت وديعة ب5.7 مليار دولار ضمن استثمارات مشروع رأس الحكمة وعندنا حوالي 9 مليار دولار ودائع للسعودية والكويت بواقع  5.3 مليار دولار من السعودية و4 مليارات دولار من الكويت وفي احتمال كبير يتحولو هما كمان للاستثمارات.