مد حجز شقق الإسكان الاجتماعي.. شوف اللي حصل

هي وزارة الإسكان قررت تمد فترة حجز شقق الإسكان الاجتماعي ولا الكلام ده إشاعات، وهل لو صدر قرار فعلا، فده معناه إن الكل هياخد شقق، طب إيه هي استفادة المواطن اللي عايز يحجز له شقة من الإجراء ده.. هنقولك كل التفاصيل في الفيديو ده فتابعنا للآخر. 
 

في الساعات الأخيرة، مى عبد الحميد، الرئيس التنفيذى لصندوق الإسكان الاجتماعى ودعم التمويل العقارى، أعلنت عن صدور قرار، بمد فترة شراء كراسة الشروط لوحدات الإسكان الاجتماعي الجديدة وتسديد مقدم جدية الحجز لحد يوم الثلاثاء 31 ديسمبر 2024.

وقالت، إن القرار ده هدفه هو تعويض المواطنين عن فترة التوقف المؤقت فى بيع كراسات الشروط بمكاتب البريد المميكن، عشان الصندوق بيسعى لمنح الفرصة بشكل كامل لأصحاب المعاشات لاستلام معاشاتهم بسهولة، وبعد كده هيطرحوا الكراسات للمواطنين بقية الشهر.

والكلام ده طبعا خاص بالوحدات السكنية اللي تم طرحها تحت مسمى مبادرة "سكن لكل المصريين 5"، وهيتم وقف بيع كراسات شروط مؤقتة خلال الفترة من السبت 30 نوفمبر لحد الثلاثاء 3 ديسمبر ، عشان المعاشات تقبض.

ونقدر نقول، إن المبادرة الرئاسية "سكن لكل المصريين 5"، بتشهد إقبال كبير جدا من المصريين، وبالفعل لحد دلوقتي تم بيع 220.740 كراسة شروط، وسدد 42.757 مواطن مقدم جدية الحجز بعد 3 أيام بس من الإعلان.

ولو حضرتك عايز تقدم على شقق الإسكان الاجتماعي 2024 "سكن لكل المصريين 5"، أول حاجة لازم تكون مصري الجنسية، وعمرك يكون ما بين 21 لحد 50 سنة.

كمان، دخل حضرتك لو أنت من محدودي الدخل، فمايزيدش عن 12,000 جنيه للفرد و15,000 جنيه للأسرة، وللمتوسطي الدخل عن 20,000 جنيه للفرد و25,000 جنيه للأسرة.

نيجي بقى للأوراق المطلوبة، فهي صورة بطاقة الرقم القومي للزوج والزوجة، وصورة من عقد إيجار الوحدة السكنية الحالية، وشهادة دخل، وإيصال مرافق حديث، وقيد عائلي مميكن، وكمان قسيمة جواز مميكنة، وبرنت تأمينات (إن وجد)، وصورة شهادات ميلاد الأبناء، وإيصال سداد مبلغ جدية الحجز، وإيصال سداد كراسة الشروط.

ومطلوب كمان، الإقرار المرفق بكراسة الشروط بعد التوقيع عليه، واستمارة الحجز المرفقة بكراسة الشروط.

وبالنسبة لخطوات التقديم، فهي إنك تشتري كراسة الشروط من أي مكتب بريد ب300 جنيه، وتسدد مقدم جدية الحجز 20,000 جنيه للشقق في المحافظات و30,000 جنيه للشقق في المدن الجديدة، ومصروفات إدارية 355 جنيه

وتقدر تسجل إلكتروني على موقع صندوق الإسكان الاجتماعي ودعم التمويل العقاري، وتملا استمارة التسجيل وتفعل الحساب، وتقدم الطلب، يعني تختار "تقديم طلب وحدة سكنية" وتملا استمارة الحجز وترفق المستندات المطلوبة، وبعد كده تعمل إرسال الطلب وتأكيد نجاح العملية من خلال رسالة بتظهر في الصفحة الشخصية.

ولو ماتعرفش، فالتقديم مستمر لحد نهاية شهر ديسمبر 2024، فحاول تجهز كل أوراقك المطلوبة والتزم بالشروط المحددة عاشت طلبك يتقبل.