لو ناوي تركب.. شوف آخر أسعار عدادات الكهرباء
كتير من المصريين بيدوروا على أسعار تركيب عدادات الكهربا، وده عشان الكثافة السكانية زادت وبالتالي في توسع في عمليات البناء غير الشرعي، وكمان التسكين في الشقق الجديدة.
عشان كده، شركات توزيع الكهرباء في جميع محافظات الجمهورية، بتقوم دلوقتي بتركيب عداد كودي لأي منشأة ومبني بيستمد التيار الكهربائي بطريقة غير قانونية، فبيتم تركيب العداد لحد ما صاحب البيت يقنن أوضاعه ويتصالح.
وفي الساعات الأخيرة، أعلنت شركات التوزيع، عن تفاصيل أسعار عدادات الكهرباء الجديدة 2024 في جميع المحافظات، وده حصل بعد موافقة مجلس الوزراء على إلغاء نظام الممارسة، عشان يسمح لموظفي شركة الكهرباء بتركيب العدادات الكودية لجميع المخالفين بدون استثناءات، لحين تصحيح أوضاعهم مع أجهزة الدولة المختلفة بشكل قانوني.
نيجي بقى، لآسعار عدادات الكهرباء 2024، فقيمة تركيب العداد هي: 1274 جنيه، شامل النقل والتخزين، أما رسوم التركيب فهي: 285 جنيه، وبيتم شحن العداد بقيمة 100 جنيه.
أما أسعار عدادات كهرباء الثلاثية، فسعرها: 1547 جنيهً، شامل مصاريف النقل والتخزين، أما رسوم التركيب فهي: 285 جنيه، يشمل شحن العداد بقيمة 100 جنيه، وكمان سعر تركيب العداد المحول هي 1935 جنيه.
وبخصوص المحلات التجارية، فسعر تركيب عداد الكهرباء داخل المحل هي 1600 جنيه، ولو كان العداد الكودي إلكتروني 3 فاز فبتكون تكلفته: 2000 جنيه.
وأخيرا، أنواع العدادات الكهربائية المعتمدة بجميع شبكات شركات توزيع الكهرباء، فهي عداد أحادي الوجه أو كهروميكانيكي، وكمان عداد أحادي الوجه إلكتروني، وعداد أحادي الوجه إلكتروني مسبق الدفع، وكمان عداد أحادي الوجه إلكتروني ذكي.
في كمان، عداد ثلاثي الوجه، وعداد ثلاثي الوجه كهروميكانيكي، وعداد ثلاثي الوجه إلكتروني، وعداد ثلاثي الوجه إلكتروني مسبق الدفع، وعداد ثلاثي الوجه إلكتروني ذكي.
ضيف على القايمة كمان، عداد ثلاثي الوجه بمحولات تيار كهروميكانيكي، وعداد ثلاثي الوجه بمحولات تيار إلكتروني، وده بيستخدم لقياس كمية القدرة الفعالة المستهلكة في الساعة.
وقبل ما تركب عداد، هنقولك على شوية نصايح مهمة، أولها إنك لو بتركب لأول مرة، اطلب من الفني اللي بيركب، أنه يثبت العداد كويس قبل ما يمشي، وتاني حاجة اتأكد كويس من ضبط التاريخ والوقت المسجل بالعداد بنفس يوم التركيب.
وأخيرا، حط الكارت في العداد قبل أي عملية شحن، عشان تتأكد إن مافيش مشكلة والخدمة شغالة كويس.
