انفراجة كبرى في أزمة الدولار.. خبر الموسم من البنك المركزي
يا ترى ليه صافي الأصول الأجنبية ارتفع للشهر السادس على التوالي؟ وإزاي لأول مرة من سنين، الفائض في الأصول الأجنبية وصل لـ10.6 مليار دولار؟ وهل ده معناه إن الاقتصاد ماشي في السكة الصح؟ وهل هنشوف فرق حقيقي في سعر الدولار أو فرص الاستثمار قريب؟ وايه أص صافي الصول الأجنبية ده ؟ .. لو عاوز تفهم الحكاية خليك معانا للآخر وهترف ايه اللى بيحصل بالظبط.
طيب فى الأول كده .. يعني إيه أصلاً فائض أصول أجنبية؟
ببساطة، ده الفرق بين اللي البنك المركزي المصري عنده من عملات أجنبية (زي الدولار واليورو) واللي عليه من التزامات أو ديون بالعملات الأجنبية…والرقم ده مهم جدًا لأنه بيقولنا البنك المركزي مستقر ولا مضغوط جاهز يواجه أي أزمة ولا فيه تحديات.
وخلونا ندخل في الأرقام شوية..لحد نهاية أكتوبر 2024، الفائض في صافي الأصول الأجنبية للبنك المركزي وصل لـ10.6 مليار دولار (يعني حوالي 520 مليار جنيه) وده بيعتبر زيادة عن الشهر اللي قبله اللي كان الفائض فيه 10.4 مليار دولار.
الخبر الحلو إن ده الشهر السادس على التوالي اللي البنك المركزي فيه بيحقق فائض.. وده تطور كبير جدًا خصوصًا لما نفتكر إن من سنة أو أكتر كان فيه عجز واضح.
تفتكروا إمتى بدأ التحول ده؟
في مايو 2024. في الشهر ده، البنك المركزي اتحوّل من عجز قيمته 36 مليار جنيه في أبريل لتحقيق فائض قيمته 458 مليار جنيه في مايو. ومن ساعتها، الأرقام في زيادة مستمرة
دلوقتي ممكن حضرتك تسأل: طيب، الأرقام دي تأثيرها إيه علينا كأفراد أو على الاقتصاد عمومًا؟
أول حاجة ده بيبعث رسالة ثقة للأسواق العالمية والمستثمرين لما يشوفوا إن البنك المركزي مستقر وعنده فائض في الأصول الأجنبية و ده معناه إن مصر قادرة تدير التزاماتها الخارجية بسهولة.. وتاني حاجة ده بينعكس مباشرة على سوق صرف العملات الأجنبية .. ولما البنك المركزي يبقى عنده احتياطي قوي بيقدر يتدخل لو حصل أي ضغط على الجنيه وده بيخلي سعر الدولار أكثر استقرارًا.
طب هل ده ليه تأثير على مناخ الاستثمار ؟
لما المستثمرين يلاقوا استقرار في العملة وفائض في الأصول الأجنبية ده بيطمنهم إن السوق المصري آمن لاستثماراتهم.. وده ممكن يفتح الباب لاستثمارات جديدة في قطاعات مختلفة، زي الصناعة، الطاقة، والتكنولوجيا.. كمان، وجود فائض بالشكل ده بيساعد الحكومة والبنك المركزي إنهم يوجهوا تمويل أكبر لمشروعات البنية التحتية، وتحفيز النمو الاقتصادي، بدل ما يكونوا مشغولين بسداد الديون."
في النهاية .. الأرقام دي مش مجرد أرقام على ورق.. 10.6 مليار دولار فائض في الأصول الأجنبية معناه إن مصر على الطريق الصح لتحقيق استقرار اقتصادي حقيقي.. وسعر الدولار ممكن يفضل مستقر والمناخ الاستثماري بيتحسن، وده كله في صالحنا كمواطنين.. لكن الأهم إننا نفضل متابعين التطورات دي ودايمًا ناخد المعلومة من مصدرها الصح.
