لو بتفكر تشتري.. شوف مستقبل الدهب رايح على فين؟
يا ترى مستقبل الدهب رايح على فين، هل في انخفاض ولا ارتفاع في الأسعار الفترة الجاية، ولو ناوي تشتري تنزل ولا تستنى شوية؟.. خليكم معانا للأخر وهنعرف التفاصيل مع بعض في التقرير دا.
دلوقتي، خبراء الدهب توقعوا إن الأسواق على الصعيد العالمي هتشهد تراجع في أسعار المعدن الأصفر بنسبة 1.9% خلال أسبوع، وده نتيجة القفزة اللي حققها الدولار الأمريكي، وبالتالي ده أثر بشكل سلبي على الدهب، لأن العلاقة بين الدولار والدهب عكسية، لو ارتفع الأخضر ينزل الأصفر والعكس صحيح.
والكلام ده معناه إن سعر الدهب العالمي اللي ما بين الانخفاض والاستقرار دلوقتي، هيرجع يرتفع تاني بشكل تدريجي خلال الفترة الجاية، ونقدر نقول إن الاستقرار الحالي جه نتيجة الحالة السياسة اللي كانت بتمر بها الولايات المتحدة الأمريكية وفوز ترامب، ومع تزايد الطلب على شراء الدهب هيعاود الارتفاع من جديد.
عشان كده، سعر الأوقية العالمية هيصل إلى ما بين 2800 و2900 دولار، وهيتأثر السعر المحلي في مصر بالتبيعة للسعر العالمي، عشان كده الوقت الحالي مناسب للشراء وفقا للسيولة المتاحة لكل واحد.
واتراجع سعر الدهب المحلي خلال تداولات الأسبوع الماضي، بنسبة 0.3% وبمقدار 10 جنيه، بالنسبة للجرام عيار 21، وأغلقت تداولات الأسبوع عند 3760 جنيه للجرام بعد ما افتتح الأسبوع عند 3770 جنيه، وده كان سبب في إن المعدن الأصفر يخسر قمته السعرية اللي سجلها.
كمان، تراجع سعر الدهب محليا خلال تداولات اليوم، وفي احتمالية تراجع الأسعار العالمية خلال تداولات الأسبوع الجاي، واللي بالتالي هتأثر على الأسواق المحلية وتنزل الأسعار.
وبناء على الكلام ده، فأسعار الدهب المحلية في مصر انهاردة حققت أول تراجع كبير خلال منتصف تعاملات الصاغة، عشان يتراجع عيار 21 بقيمة 40 جنيه الآن عشان يوصل 3630، بينما تراجع سعر جرام الذهب عيار 18 بنحو 34 جنيه.
وخسر عيار 24، خلال منتصف التداولات عشان يسجل قيمة 4148 جنيه بدون مصنعية، وعيار 18
سجل 3111 جنيه بدون مصنعية، وكمان الجنيه الدهب سجل 29040 جنيه بدون المصنعية.
فلو حضرتك ناوي تشتري دهب، ماتترددش وانزل اشتري قبل ما الأسعار ترفع تاني.
بس لازم قبل ما تشتري تتنقل بين عدة تجار وتسأل كويس عن الأسعار عشان مايتنصبش عليك، وكمان لازم تشتري من تاجر أمين ومعروف.
كمان اسأل كويس عن قيمة المصنعية بين المحالات وقارن بينها، ويفضل تشتر عيار21 نظرًا عشان هو الأقل مصنعية عند البيع.
وماتنساش، تختار دهب موثوق وذات سمعة جيدة في السوق، واتجنب تشتري الفصوص، وياريت تتأكد من إثبات الفصوص الموجودة في المشغولات الذهبية في الفاتورة حتى عشان ماتخسرش لما تيجي تبيعه.
ونقدر نقولك، إن يفضل تشتري السبائك الدهبية لو ناوي على الاستثمار أو ادخار المال، وفي النهاية لازن تاخد فاتورة ضريبية باللي اشتريته.
