لو عاوز تشتري عربية.. 3 بنوك هتقدملك قرض 2025 يوصل إلي 9 مليون جنيه
نفسك تشتري عربية ومش معاك فلوس، بتفكر كتير ومش لاقي أي حيلة، خلاص يا سيدي الحل عندنا.
البنوك المصرية بتقدملك دلوقتي قروض السيارات 2025، اللي بتحرص على تسهيلها للعملاء بمزايا وشروط ميسرة.
وأول البنوك دي، هو البنك التجاري الدولي Cib، فممكن حضرتك تقدم بكل سهولة على القرض ده اللي بيتميز بأنه أكبر مبلغ لقرض السيارة بقيمة تصل إلى 9 مليون جنيه أو 100% من سعر السيارة سواء للموظفين أو أصحاب المهن الحرة.
أما فترات سداد، فيتكون خلال 8 سنين كحد أقصى، أما سعر العائد فبيبلغ 26%، وهنا مافيش حظر بيع أو تأمين على السيارة محل المعاملة.
بس لازم حضرتك تجهز شوية ورق ومستندات، زي صورة البطاقة الشخصية وتكون سارية وعرض سعر سيارة وإثبات دخل أو بيان راتب في حالة كنت موظف، وكشف الحساب البنكي سواء شخصي أو شركات عن آخر 6 أشهر، وفي حالة أصحاب المهن الحرة فلازم تقدم أصل السجل التجاري أو أي حاجة تعادله.
وأهم مميزات يميز قرض السيارة من البنك التجاري، هي توفيره خدمات التقسيط دون فوائد لخدمات ما بعد بيع السيارة، زي شراء قطع الغيار باستخدام بطاقات الائتمان CIB.
نيجي بقى لقرض المصرف المتحد، فالبنك ده بيتيح لحضرتك قرض سيارة بفترات سداد بتصل ل 10 سنين.
وهنا المقدم بيكون 10% وسعر الفائدة تنافسي، مع العلم أن مبلغ القرض بيصل ل 3 مليون جنيه كحد أقصى ومتاح للعملاء الأفراد سواء الموظفين وأصحاب المهن الحرة.
وبيتميز قرض السيارة من المصرف المتحد، أنه بدون مصاريف إدارية مع إتاحة خيارات سداد مرنة ومتعددة، وكمان إصدار وثيقة تأمين سنوية على السيارة ووثيقة تأمين على الحياة للعميل.
ومن المصرف المتحد لبنك مصر، فهو كمان بيتيح لحضرتك تاخد قرض سيارة مستعملة بدون مقدم، وبسعر فائدة يتراوح بين 24 و25%، وفترات سداد 5 سنوات كحد أقصى.
ومن هنا، بنك مصر مش بيشترط وجود ضامن أو تحويل المرتب على بنك مصر، وممكن كمان يمول شراء السيارة بنسبة 100% من سعرها الحالي.
لكن أفضل مميزات شروط قرض السيارة المستعملة من بنك مصر، أنه مافيش حد أدنى لعمر صاحب القرض، ومافيش مقدم، ولو أنت مش موظف فمتاح تاخد القرض بكل سهولة.
وفي النهاية هنقدملك شوية نصايح قبل ما تشتري عربية، فلازم تجمع معلومات عن العربية اللي انت ناوي تشتريها كويس، ويفضل تاخد معاك حد فاهم في العربات عشان يتأكد من جودتها ويختبرها كويس، ولو عجبتك العربية وطلعت مناسبة ليك ماتنساش تعمل عقد رسمي بعملية البيع والشراء ويكون موثق في الجهات الحكومية وده عشان تضمن حقك.
وحاول تشتري من تاجر معروف ومضمون وسمعته كويسة، وماتنساش توثق أوراق العربية أول بأول.
