عيش بلدي بتقنية الليزر لأول مرة في مصر ؟

 
مفيش شك ان التكنولوجيا بقت عامل أساسي في حياتنا اليومية وكل الناس بتعتمد عليها سواء في شغلها أو حتى في الأمور الترفيهية بس كنت تتخيل انك ممكن تاكل رغيف عيش بلدي مصنوع عن طريق الليزر  ؟؟

وعايز اقولك كمان ان المشروع شغال دلوقتي في عدد من محافظات مصر منها محافظة البحر الأحمر.. وخليك معايا لاخر التقرير  علشان تعرف كل التفاصيل 

المشروع يا صديقي بيتم في إطار تطوير منظومة التموين في مصر، وحرص الدولة على التوسع في استخدام التكنولوجيا ودا علشان الدقة في العمل واختصار الوقت لصالح المواطن.

وبدأت مخابز محافظة البحر الأحمر المصرية في تطوير منظومة الخبز المدعم باستخدام تقنية الليزر واللي بتعتمد على إنتاج رغيف عيش بشكل آلي.
يقول 

وشاذلي عايش، مدير مديرية التموين بمحافظة البحر الأحمر اكد إن مخابز مدينة الغردقة بدأت فعلا في تطوير منظومة الخبز المدعم باستخدام التكنولوجيا، ودا من خلال تقطيع رغيف "العيش" بتقنية الليزر، لإنتاج رغيف عيش بشكل آلي ودا هيخلي الانتاج في الجودة و الوزن مطابق للمواصفات القانونية.

وعايش اكد كمان ان وزارة التموين بتشجع أصحاب المخابز على التحويل إلى النظام الآلي الكامل ، ومن أبرز مميزات المخبز الآلي أنه يُنتج 10 آلاف رغيف في الساعة الواحدة ويقضي على الزحام.

وقال كمان ان طريقة عمل المخبز الآلي بتكون عن طريق عدد من المراحل أهمها مرحلة التقطيع واللي بتكون عبارة تقطيع العجينة لأقراص صغيرة، وبعد كده مرحلة الفرد ومرحلة التخمير وبعدها الرغيف بيمر داخل السيور لحد لما يوصل لبيت النار وبعد كده آخر مرحلة وهي سير التهوية والمواطن بيستلم العيش بشكل جيد جدا ومطابق للمواصفات القانونية .

ومدير التموين أكد ان عملية التطوير على نفقة صاحب المخبز، ودور الحكومة تشجيعه ومنحه ميزات زي زيادة حصته ودا بعد عمل دراسة، والموضوع دا كان سبب في خلال سنة تم تحويل 10 مخابز من العمل بالطريقة العاجية للعمل  بالطريقة الآلية وكانت في الغردقة والشلاتين وحلايب ورأس غارب .