وداعا بطاقة التموين.. اعرف موعد تطبيق الدعم النقدي ومميزاته

امتى الحكومة هتطبق الدعم النقدي بدلا من التموين وايه الفئات المستحقة للدعم الجديد وايه الفئات المستبعدة وطريقة توصيل الدعم في صورته الجديدة.. كل ده هنعرفه مع حضراتكم في الفيديو ده خليكم معانا للآخر. 
 

كتير من المصريين بيبحثوا دلوقتي عن الدعم النقدي الجديد، اللي أعلنت عنه وزارة التموين وقالت إنه هيساهم في وصول الدعم لمستحقيه وهيفوت الفرصة على أي حد غير مستحق، وفعلا الناس مهتمة جدا بالموضوع ده خاصة بعد تصريحات وزير التموين امبارح، عن هيكلة منظومة الدعم.

ونقدر نقول، إن وزارة التموين ناوية على التحول إلى الدعم النقدي بدلا من الدعم العيني، يعني بدل السلع التموينية حضرتك هتاخد مكانها فلوس وتشتري اللي نفسك فيه، ولكن  في فوايد كتيرة هتعود على المواطن والدولة من تطبيق الدعم النقدي الجديد.

أول مزايا الدعم النقد، هي ضمان حصول المواطن على حقه وتقليل فرص الفساد المرتبطة بتوزيع السلع العينية، يعني زي ما قولنا حضرتك هتاخد حقك فلوس وده هيمنع أي فرصة على معدومي الضمير انهم يبيعوا السلع أو يتلاعبوا أو يتأخروا في تسليمها للمواطنين.

طب يا ترى امته الحكومة هتطبق الدعم النقدي؟

بص يا سيدي، وزير التموين الدكتور شريف فاروق، أكد انهم مهتمين جدا بإيصال الدعم لمستحقيه، وأن بلغة الأرقام بتصل قيمة الدعم بصورته الكبيرة اللي بتوجهه الدولة للمواطنين بيفوق 636 مليار جنيه، أما الدعم السلعي والخبز فبيتخطى 135 مليار جنيه بعد ما كانت 63 مليار جنيه تحملتها الدولة في فرق توفير  السلع الخاصة بالتموين، وده معناه إن الدولة عمرها ما هترفع ايديها عن الدعم اللي بتقدمه للمواطن، وعندها  إصرار كبير على أن يصل الدعم لمستحقيه.
وكشف الوزير أنه هيتم تطبيق المنظومة الجديدة للدعم بعد الانتهاء من كل الامور الفنية والإحصاءات والمراجعات وتحديد الفئات المستحقة وكيفية توصيل الدعم النقدي.

ونقدر نقول إن نصيب الفرد في حالة التحول من الدعم العيني إلى الدعم النقدي، هيكون 175 جنيه شهريًّا، شامل رغيف العيش والتموين، ومع بداية الموازنة الجديدة لسنة 2025، هنبدأ أول خطوة في تنفيذ النظام ده على مستوى.

ولكن قبل إلغاء بطاقات التموين، نقدر نقول إن في فئات مش هتاخد الدعم النقدي ده، وهي كل رب أسرة بتجاوز استهلاكه للكهربا 1000 كيلووات، وكمان اللي بيدفع فاتورة محمول مرتفعة أكثر من 600 جنيه شهريًا.

وكمان اللي متوسط المصروفات المدرسية لأكتر من طفل 20 ألف جنيه، ضيف على ده مالكي الحيازات الزراعية لأكتر من 10 أفدنة فأكتر، واللي بيسدد ضرايب 100 ألف جنيه فأكثر، وكمان أصحاب شركات رأسمالها 10 مليون جنيه فأكثر، واللي عنده عربية موديل 2017 فأعلى، وسارقي التيار الكهربائي، وكمان المتعدين على الأراضي الزراعية وأراضي الدولة.

وفي النهاية، نقدر نقول إن من فوايد التحول للدعم النقدي، تقليل فرص الفساد المرتبطة بتوزيع السلع، يعني هتحصل عدالة، وكمان الدولة هتضمن  وصول المساعدات للفئات المستحقة مباشرة.

ضيف على كل ده، إن الدعم النقدي هيساهم في  تحسين جودة الخدمات المقدمة للمواطنين والارتقاء بمستوى المعيشة، وكل ده هينعكس بالإيجاب على حياة المواطن والاقتصاد المصري