ليه أسعار السجاير لسه بتغلي وآخرتها إيه.. مفاجأة في التفاصيل

الشركة الشرقية للدخان فاجئتنا بتطبيق زيادات جديدة في أسعار المنتجات بتاعتها.. ياتري اية اسباب الزيادة الجديدة  وليه الحكومة مش بتدخل في موضوع الزيادات المستمرة في السجاير.. تعالوا نشوف إيه الحكاية 
 
في صدمة جديدة للمدخنين، مجلس إدارة الشركة الشرقية إيسترن كومباني، اعتمد في اجتماعه الأخيرة زيادة جديدة في أسعار كل منتجاتها سواء سجائر كليوباترا أو غيرها من الأنواع التانية الكثيرة والمنتشرة في الأسواق، وفعلا الشركة أعلنت عن بدء تطبيق الزيادة الجديدة.
طيب اية هيا اسباب الشركة لرفع أسعار السجائر في الأسواق ؟.
الشركة الشرقية للدخان قالت إن الزيادة الجديدة في أسعار منتجاتها واللي وصلت ل 12% سببها امتصاص جزء من الزيادة اللي حصلت في تكلفة التصنيع نتيجة تغير سعر صرف الدولار قدام الجنيه المصري من 31 الى 48 جنيها وارتفاع أسعار المواد الخام التبغية وغير التبغية بشكل عام وارتفاع تكلفة الشحن بسبب الظروف اللوجستية الحالية واللي اثر كبيرة في ارتفاع تكلفة الإنتاج علي الشركة.

الشركة قالت كمان أن مكون المواد الخام التبغية وغير التبغية واللي بيمثل أكتر من 75٪ من إجمالي تكلفة التصنيع غير شاملة الضرائب، وحاليا النسبة دي أصبحت عبء كبير على الشركة طوال الفترة اللي فاتت وحاولت بكل الطرق امتصاص الاعباء الجديدة عن طريق تحسين الأداء التشغيلي، ورفضت علي مدار الشهور اللي فاتت تحميل التكلفة الإضافية للمواطنين.

الزيادة الجديدة في أسعار السجائر وصلت ل4 جنيه مرة واحدة ووصلت أسعار البوكس والسوفت والكوين والكينج زايز والبلاك والسوبر ل 38.75 جنيه، والعلبة الكليوباترا البوكس عدد 10 هيوصل سعرها ل27 جنيه. علبة البوسطن والبلمونت هيوصل سعرها ل 38.75 جنيه، والعلبة فايسروي والبال مال هيوصل سعرها ل60 جنيها والعلبة المونديال بأنواعها والمونديال سويتش هيوصل سعرها ل38.75 جنيه، والعلبة ماتوسيان سوبر هيوصل سعرها ل 38.75 جنيه.
الشركة قالت كمان أن بالرغم من الزيادة اللي طبقتها الشركة في شهر أبريل اللي فات، إلا انها مش قادرة تغطي نسبة العجز الناتج عن ارتفاع عناصر التكلفة، خصوصا أن أي زيادة سعرية بتتحصل منها الشركة 50٪، ولكن مع استمرار زيادة أسعار المواد الخام وزيادة مصاريف النقل والشحن والتخزين اضطرت الشركة لتحميل المستهلكين جزء من الزيادات الجديدة لتغطية جزء من عناصر التكلفة، خصوصا أن الشركة بتوريد 50٪ من أرباحها لخزينة الدولة كضريبة قيمة مضافة وفقا لأحكام القانون.
للأسف أسباب الشركة لرفع الأسعار بتقول إن سعر منتجاتها مرتبط بشكل أساسي بسعر الدولار ومع الزيادة الجديدة في سعر العملة الأمريكية واللي تخطت حاجز ال49 و30 قرش ممكن يكون فيه زيادات تانية لمنتجات السجاير والحكومة منقدرش تتدخل عشان الشركة قالت أسباب منطقية واي قرار حكومي بمنع الزيادة هيتسبب في خسائر للشركة ودا ممكن يدفعها لغلق مصانعها عشان مفيش مستثمر هيبيع بالخسارة.